Imphal, Lber:
Ha ka jingpyntreikam kaba jur pyrshah ïa ki kam khaïi drok, ki shipai Assam Rifles ki la ïoh ban kurup 1,518 gram u drok Heroin No. 4, ba la buhrieh ha ki 132 tylli ki song sabon, kaba shongdor kumba T.15.4 klur ha ka shnong Thingkangphai, Churachandpur distrik.
Ha ka jingpyntreikam hadien ba la ïoh ïa ki jingtip kiba bniah, ki shipai jong ka Assam Rifles ki la pynlong ïa ka jingpynap shrip bad ïoh ban bat ïa kawei ka kali Mahindra Bolero kaba lieh ha ka miet jong ka Lah Sngi U Blei ha ka shnong Thingkangphai. Ha kane ka jingkhynra, ki la kem ïa u nongñiah kali, uba la tip kyrteng kum u Thangsuanman (44) na ka shnong M Tanglian.
Ïa une u briew uba la shah kem, ryngkat bad ki song u drok la kurup bad ïa ka kali, la aiti sha ki pulit jong ka Churachandpur ban tohkit bniah bad ban pynngat ïa ki kyndon aiñ katkum ka aiñ NDPS, 1985, la ïathuh u PRO jong ka tnad ïada ri haba kren sha ki lad pathai khubor.
