Chandigarh, Lber:
Ki pulit ha Punjab ha ka sngi Balang ki la buh bun tylli ki jaka khynra, bad ki la pynkhlaiñ ïa ka jingpahara ha baroh ki jaka rung jong ka Chandigarh namar ba ka la khanglad ïa ka jingïakhih jong ki nongrep ban ïaid paidbah sha ka Union Territory ban ïashim bynta ha ka jingïakhih kaba shi taïew kaba la khot da ka Samyukta Kisan Morcha.
Ha kane ka jingpynkhreh, ka la kem katto katne ngut ki nongïalam ba rangbah jong ka seng nongrep kiba hadien la pyllait noh ha ka por janmiet.
Katba ki nongrep ki la pynlong ïa ki jingïakhih ha ki 28 tylli ki jaka – ki jaka ha kiba ki la shah pynsangeh ha ki Pulit ka Punjab.
U General Secretary ka Bhartiya Kisan Union (Ekta Ugrahan) u Sukhdev Singh Kokrikalan u la ong ba ki nongrep mynta kin ym leit sha Chandigarh.
“Ban rai ïa ka lynti treikam kaba bud, la khot ïa ka jingïalang jong ka SKM ha Ludhiana ha ka 7 tarik u Lber”, la ong u Kokrikalan.
Hynrei ka SKM, ha ka jingpynbna, ka la maham ruh ïa u Mann, ba ka sorkar jong u, “kan ym don patok kaba biang ban thep, lada ki nongrep jong ka Punjab, ki shahkem ha ka ïingbishar, ban ïada ïa ka hok synshar paidbah jong ki paidbah”.
Kham ha shwa, ki nongrep, kiba la mih na ki jaka bapher bapher ha Punjab ban leit sha Chandigarh da ki Tractor-trolley bad kiwei kiwei ki kali, ki la shah pynsangeh ha kiba bun ki jaka ha ki surok bah bad kiwei kiwei ki surok.
Ka SKM ka la kynnoh ba da ki spah ngut ki nong-rep ki la shah kem ha ki pulit.
Kine ki kynthup ïa u Joginder Singh Ugrahan uba long u President ka seng Bhartiya Kisan Union (BKU) Ugrahan, u Balbir Singh Rajewal, u Mukesh Chander Sharma uba long u Vice-president ka jylla jong ka BKU Rajewal bad u Buta Singh Shadipur uba long u President ka BKU Shadipur.
U Ugrahan bad ki nongkyrshan jong u ki la shah rah sha thanat jong ki pulit jong ka Chhajli ha Sangrur.
Katba u nongrep u Kirpa Singh Nathuwala uba dei u dkhot jong ka Kisan Bhalai Morcha u la ïathuh ba ma u lem bad san ngut kiwei pat ki la poi ha Sector 34 ha Chandigarh da ki kali shimet, katto-katne ngut kiwei pat ki la shah khanglad ban ïaid sha ka nongbah, kaba la pynlong ïa ki nongrep ban shong ha ki surok ban pynpaw pyrshah ha Bhachowanin, Manhaharusa ha Sanghabai Garh bad ha Ghara Badbar ha Barnala, Jethuke ha Bathinda bad kiwei pat.
“Wat hapdeng ka jinglong jingman kaba long kum ka Emergency ha kaba da ki spah ngut ki shah rah ha ki pulit, ki shynrang bad kynthei ki la mih sha surok bad pyrshah ïa ka jingbthah jong u Myntri Rangbah ka Punjab, u Bhagwant Mann.
Ki nongrep kiba la shah kem hynnin ka sngi ki la shah phah sha phatok. Ngim pat ïoh ïa ka jingkheiñ kaba thikna”, la ong u Raminder Singh Patiala, Press Secretary jong ka Kirti Kisan Union. “Ngi shong ha ki surok. To ngin peit aïu u Myntri Rangbah un ong mynta”, u la bynrap.
Ha ka sngi Ba-ar, katto katne ngut ki nongïalam ka SKM ki la shah kem ha ki pulit wat haba u Myntri Rangbah ka Jylla u Bhagwant Mann u la thombor ïa ki nongrep kiba ïakhih da kaba ong ba ki la pynkylla ïa ka Punjab sha ka “jylla jong ki jingïakhih”. Hadien la pynngat ïa ki nongrep hapoh ki kyndon jong ka Bharatiya Nagarik Suraksha Sanhita kiba ïadei bad ka jingpynkheiñ ïa ka jingïasuk.
Ha ka sngi lah sngi U Blei, u Mann u la mih noh na ka jingïalang bad ki nongïalam jong ka SKM ha kaba ki la wanrah ïa ki 18 tylli ki jingdawa jong ki, kynthup ïa ka dor jingkyrshan kaba rit tam na ka bynta ki mar rep bad ka hok long trai na ka bynta ki nongrep ba la ïoh pateng.
Ha ka sngi Balang, la pynsangeh ïa ka kynhun ba nyngkong jong ki Trolley kiba don ki dkhot jong ka Bhartiya Kisan Union (BKU) hajan ka shnong Hedon ha ka thaiñ Samrala jong ka Ludhiana.
Kawei pat ka kynhun jong ki nongrep na Patiala ka la shah khanglad ban ïaid sha Chandigarh namar ba ki pulit ki pynïeng ïa ki kali kit shyiar ha ka surok Patiala-Chandigarh, la ïathuh ki tyllong khubor.
