New Delhi, Naitung:
Kumba la sakhi, la ong ba ka jingshah dait ksew jong ki briew ha ki lynti ïaid bad ki surok, ka dang bteng haduh mynta na ka jingdon jong ki ksew shang lymwir ne ki ksew laitlan, kane ka la jia wat hadien ka jingbuh jingmaham jong ka Supreme Court ïa ki jylla.
Kum ka jingmaham kaba tyngeh, ka SC ka la ong ba kan sa hukum ïa ki jylla ba kin siew da ka bailutksam kaba heh na ka bynta ki jingjia shah dait ksew namar ba ka pynpaw ïa ka jingsngewkhia jong ka halor ka jingbym pyntreikam ïa ki kyndon halor ki mrad bashang lymwir ha kine ki san snem ba la lah.
Ka kynhun nongbishar jong u Justice Vikram Nath, u Justice Sandeep Mehta, bad Justice NV Anjaria ki la ong ba wat ki nongïeid ksew bad ki nongai bam kin shah pynngat ha ka jingkitkhlieh bad hap ban ai jubab na ka bynta ki jingjia jong ki jingshah dait ksew.
“Na ka bynta man la ka jingshah dait ksew ne ka jingmynsaw jong ki khynnah ne ki tymmen, ngi thmu ban pan na ki sorkar jylla ban siew bai lutksan kaba heh, namar ba kim shym la leh ei ei halor ka jingpyntreikam ïa ki kyndon ha ki san snem ba la leit.
Kumjuh, ïa ki jingkitkhlieh bad ki jingai jubab yn sa buh na ka bynta kito kiba ju ai bam ïa ki ksew shang lymwir. Lada ki don jingïeid ïa kine ki ksew ki la dei ban ïalam ïa ki sha ïing. Balei ban pynshang ïa ki ha lynti synkien bad ba kin shu dait bad pyntieng pynsyier ïa ki briew,” la ong u Justice Nath.
U Justice Mehta u la mynjur ïa ka jingmut jong u Justice Nath bad u la ong, “Mano ba dei ban kitkhlieh haba ki ksew ki thombor ïa u khynnah 9 snem? Ka seng kaba ai bam ïa ki? Phi kwah ba ngin khap ïa ki khmat jong ngi na ka jingeh.”
Ka ïingbishar bahakhliehduh ka dang bishar ïa ki katto katne ki jingujor kiba pan jingpynkylla ïa ka hukum jong ka ha ka 7 tarik u Naiwieng, 2025 kaba bthah ïa ki bor synshar ban pynduh noh ïa kine ki mrad ba shu shang lymwir na ki jaka ba la buh kyrpang bad ki surok.
Ka ïingbishar bahakhlieh duh, ka dang bishar ïa ka mukotduma ba la pynibor, kaba la sdang ha ka 28 tarik u Naitung jong u snem ba la lah, halor ka khubor jong ki lad pathai khubor, halor ka jingshah dait ha ki ksew lymwir kaba ïalam sha ka jingpang Rabies, khamtam ha ki khynnah, ha ka nongbah jong ka ri.
Ki la don bun ki jylla kiba la sdang ban leh ei ei halor kane ka hukum jong ka SC.
Ha ka jylla Telangana, na ka liang ki riewpaidbah ki la shim ïa ka rai ha ryngkat ka jingïatreilang ka kynhun synshar jong ka Gram Panchayat jong ka shnong Yacharam kaba don ha Rangareddy distrik, da kaba kynnoh ba ki bor pynïaid jong ka shnong ki donkti ha ka jing pynïap ïa kumba 100 tylli ki ksew ba lait pathar.
Kane ka jingleh jong ki ka long namar ba ki la ïakynduh jingeh na ki jingshah dait jong bun ngut ki briew kynthup ïa ki kynthei khynnah ha ki ksew.
Hadien kane, ka la don ka jingmudui mukotduma ba la ujor hadien ba ka la don ka jingmudui da ka Stray Animal Foundation, kaba la pynpaw ïa ka kyrteng jong u Sarpanch, ki dkhot jong ka Ward bad u Panchayat Secretary kiba la pynïap pathar ïa ki ksew.
La sdang ïa ka jingtohkit halor kane ka kam. Ka jingtohkit kaba kham bniah ka dang ïaid shakhmat ban pynthikna ïa ki jingshisha kiba don sha lyndet jong ki jingkynnoh.
