Lucknow, Lber:
Uwei u lehnoh jong ka Hizbul Mujahideen u la shah kem ha ka jingkhynra lang jong ka Uttar Pradesh Anti Terrorism Squad (ATS) jong ka Saharanpur bad ki pulit ka Kathgarh na Poonch, Jammu & Kashmir hadien 17 snem, ong ki heh pulit.
Ïa une u lehnoh ba la tip kyrteng kum u Ulfat Husain la ïalam ha ïingbishar. La kem ruh ïa u ha u snem 2002 ryngkat bad saw ngut kiwei pat bad la pyllait noh ïa u ha u snem 2008, ong u Superintendent of Police (SP) u Ranvijay Singh.
Haba ïakren bad ka ANI, u SP City u la ong, “Ha ka jingkhynra lang jong ka ATS Saharanpur bad ki pulit ka Kathgarh, uwei u lehnoh Ulfat Hussain uba dei na ka kynhun Hizbul Mujahideen u la shah kem na Poonch distrik hynnin ka sngi bad ngi la wanrah ïa u ha ka ïingbishar mynta ka sngi…Ha u snem 2002, la ïoh kem ïa kiwei pat ki runar kiba bun bad saw ngut kiwei pat bad la ïoh ban kurup ïa ki tiar pynbthei, ki pistol na u…”
Shuh shuh, u la pynpaw ba u Hussain u la shah pyllait na ka jingshah set phatok ha u snem 2008; hynrei um shym la leit mih sha ka ïingbishar wat haba la pynmih ïa ki jingkhot hajir bad ki hukum pyrshah ïa u.
“La pyllait noh ïa u ha ka jingshah set phatok ha u snem 2008…la pynmih ïa ki jingkhot bad ki hukum hynrei um shym la wan mih satia ha ka ïingbishar. Ka la don ka jingthong kaba T.25,000 ïa u bad la pynmih ïa ka hukum ba neh pyrshah ïa u na ka bynta ki 50 snem ban wan. Ki pulit bad ka kynhun ATS ki la pyrshang ban wad ïa u,” bad haba la buddien halor ki jingtip ba bniah ba la ïohlum, ngi la ïohkem ïa u,” u la bynrap.
Ka jingtohkit kaba kham bniah ka dang ïaid shakhmat halor kane ka kam, la ong u heh pulit.
Ha u snem 2024, ka National Investigation Agency ka la kurup ïa ki jingdon jingem jong ki lehnoh Hizbul Mujahideen ha ka mukotduma ba la thmu ban pynïap ïa u Adoora-Kulgam Sarpanch.
Ïa ka jaka jong u Nasir Rashid Bhat — ka ïing shong briew ha ka shnong Tengpora ha Shopian jong ka Jammu & Kashmir– la shah teh hapoh ka kyndon 33 (1) jong ka Unlawful Activities (Prevention) Act, 1947, da ki hukum jong ka NIA Special Judge, Jammu.
Une uba shah kynnoh ryngkat bad kiwei pat ki dkhot jong ka seng lehnoh Hizbul Mujahideen ba la khang pyrshah ki la donkti ban pynïap ïa u Sarpanch ha ka 11tarik, Lber 2022 da ka jingthmu ban pynsaphriang ïa ka jingsyier hapdeng ki paidbah.
