New Delhi, Lber:
Ka sorkar BJP ha Delhi ka la mynjur ban pyntreikam ïa ka “Mahila Samriddhi Yojana” ha ka sngi Saitjaiñ, ha kaba ka la mang da T. 5,100 klur na ka bynta ban pynbiang mar T. 2,500 shi bnai na ka bynta ki kynthei. Ïa kane ka rai la shim ha ka jingïalang ka kynhun Myntri ba la ïalam da ka Myntri Rangbah ka jylla ka Rekha Gupta.
“Ïa ka jingkular ban ai T.2,500 sha ki kynthei na Delhi la ai muhor ka jingmynjur da ka kynhun Myntri mynta ka sngi. Ka kynhun Myntri ka la mang T.5,100 klur na ka bynta ka Mahila Samriddhi Yojana khnang ba ki kynthei ba armet na Delhi kin sdang ban ioh ia ka jingmyntoi. Ka dei ka sienjam kaba kongsan ban pynthikna ïa ka jingshong suk shongsaiñ bad ka jingkiew ha ka imlang sahlang jong ki kynthei, khamtam kito kiba na ki longïing kiba duk,” ong ka Gupta.
Ka BJP ka la kular ban ai pisa T.2,500 shibnai na ka bynta ki kynthei ha ka ‘Sankalp Patra’ jong ka ha shwa ka ilekshon sha ka dorbar thawaiñ jong ka Delhi, kaba la tam ïa ka jingtyrwa jong ka AAP kaba long T.2,100.
U President ka BJP, u JP Nadda, haba kren ha ka jingïalang Mahila Diwas ba la pynlong da ka Mahila Morcha jong ka seng ha JLN Stadium, u la pynbna ïa ka jingmynjur ïa kane ka skhim bad ai khublei ruh ïa u Gupta.
U la pynpaw ba hapoh ka jingïalam jong u Myntri Rangbahduh ka ri u Narendra Modi, ka BJP ka la pynkupbor ïa ki kynthei ha ki bynta bapher bapher.
Kane ka skhim ka dei ka jingkular ilekshon ba kongsan jong ka BJP na ka bynta ka ilekshon ha Delhi ha u bnai Rymphang.
Ka la ïarap ïa ka seng ban pynkut noh ïa ka jingshah rem kaba la neh 27 snem bad ban ïoh ïa ka jingbun paid kaba ar bynta na ka lai bynta. Kane ka jingthmu ka la pyni ruh ïa ka jingkylla ha ka nongthep vote kaba la synshar da ka AAP hashuwa.
Ha ka jingïalang ba la pynlong da ka Delhi BJP Mahila Morcha ha Jawaharlal Nehru Stadium ha ka sngi rakhe ïa ka International Women’s Day, ka Gupta ka la pynbna ba la thaw ïa ka komiti, ba la ïalam da ka bad ba kynthup ïa ki Myntri sorkar u Parvesh Sahib Singh Verma, u Ashish Sood, bad u Kapil Mishra, ban peit ïa ka jingpyntreikam ïa kane ka skhim.
Yn plie noh shen ïa ka jaka pynrung kyrteng, bad ka komiti kan pyndep ïa ki kyndon jong ka skhim. “Baroh ki kyndon la ïakren ha ka kynhun Myntri, bad ka komiti kan sa pynkut noh shen khnang ban pynlah ban pynrung kyrteng.
Ka tnad IT ka dang trei ïa ka portal”, la ong ka Rekha Gupta ha ka lad pathai khubor.
Katba ki jingbthah ba pura kim pat pynmih, ki tyllong khubor ki ai jingmut ba ki kyndon ban ïoh ïa ka jingïarap ba la ïakren ki kynthup ïa ka rta kaba 21-60 snem bad ka jingïoh kaba T.2.5 lak shisnem.
Ki kynthei ki lah ban aplai ïa kane ka skhim lyngba ka Online Portal kaba dang wan.
Ka sorkar Delhi ka la pynpaw ba kane ka skhim kan pyndonkam da ki kor ki bor kiba thymmai na ka bynta ka jingshai, ka jingtreikam kaba paka, bad ka jingpynmih pisa kaba khlem jingeh.
Yn pyndonkam da ka e-KYC kaba pynshong nongrim ha u Aadhaar na ka bynta ban pynrung kyrteng, la khmih lynti ba kan sdang hapoh ar taïew.
Kane ka skhim ka long tang na ka bynta ki kynthei ki bym dei ki nongtrei sorkar ne ki nongïoh jingmyntoi na kiwei pat ki prokram ai jingïarap pisa jong ka sorkar.
