Hyderabad, Lber:
U Myntri Rangbah ka jylla A Revanth Reddy ha ka sngi Saitjaiñ u la pynpaw biang ba ka sorkar jong u kan ym shongthait tad haduh ban da pynlong ïa ki kynthei ki Crorepati bad u la sam ïa ki cheque kiba shongdor T.22,794 klur kum ka jingïarap pisa sha ki SHG ne ki seng ba ïeng hala ki jong ki kjat.
Haba kren ha ka jingïalang paidbah jong ka Mahila Shakti kaba la pynlong ha ka sngi rakhe ïa ka International Women’s Day ha madan Parade, u la pynbna ba ka sorkar kan ai jaka ha man la ki Mandal sha ki Self-Help Group (SHG) ban buh ïa ki jaka tylliat khaw bad ki Godown ban buh ïa u khaw ba la thied da ki kynhun. U la ong ruh ba yn pynlong trai ïa ki kynthei ha ki hajar tylli ki bos ilektrik.
Ha kane ka jingïakynduh la leit ban ïashim bynta da u Symbud Myntri Rangbah ka jylla u Mallu Bhatti Vikramarka bad ki Myntri kiba kynthup ïa k Konda Surekha, Seethakka lem bad kiwei kiwei pat.
Haba kynnoh ba ka sorkar barim jong ka BRS ka la iehnoh beiñ ïa ki SHG bad ka leh beiñ ïa ki kynthei, u Revanth u la ong ba kane ka sorkar ba mynta ka pynthikna ïa ka jingburom ïalade jong ki kynthei bad pynkhlaiñ ïa ki SHG. U la pynpaw ba ka ïoh ka kot kaba long USD 1 trillion ha ka jylla ka long kaba lah tang haba shi klur ki kynthei ki kylla long ki Crorepatis.
U Myntri Rangbah u la pynkynmaw ban shaniah ha ki SHG ban maramot ïa ki skul bad u la ong ba kine ki skul ki dei ban ïakhun bad kito kiba don ha ka liang jong ki kompeni.
“Ïa ki kontrak ban suh ïa ki jaiñ skul la ai sha ki SHG. Ngi la pynkiew ïa ka bai suh sha ka T.75 na ka T.25 shijur. Hashwa, u KCR u la ai kontrak sha ki kompeni heh da kaba buh khmat ha ka Commission”, u la ong.
U la kdew ba ka sorkar ka la mang 25 klur tyngka sha kawei kawei ka distrik ban shna ïa ki ïing jong ka Indira Mahila Shakti. U la pynpaw ïa ka jingsngewskhem ba ki kynthei ki lah ban ïakhun bad ki karkhana kum ka Ambani bad ka Adani ha ka kam khaïi.
Haba kynnoh ba u Myntri Rangbah barim u K Chandrasekhar Rao, ha ka por ba u bat nyngkong ïa ka bor, um shym la kynthup satia ïa ki kynthei ha ka kynhun Myntri jong u, u la ong ba ka sorkar jong u mynta ka don ïa ka Konda Surekha bad ka D Seethakka.
“Ha ka ilekshon ban wan, 33 percent ki seat yn buh kyrpang na ka bynta ki kynthei. Ngan shim ïa ka jingkitkhlieh ban pynthikna ïa ka jingjop da kaba ai tiket ïa kito kiba don ïa ka jinglong nongïalam. Ki kynthei ki dei ban wan shakhmat bad shimti ïa ki kam nongïalam ban shakri ïa ka imlang-sahlang,” u la pynskhem.
U la kyntu ïa ka BRS ban ai jingmut ha ka ban tei ïa ka sorkar katkum ka jingshem jong ki ha ki por ba la leit noh ha ka jaka ban khanglad ïa ki prokram sorkar. U la ong: “Hato ka long kaba dei ba ka BRS kan pyndonkam bakla ïa nga ban ïoh ïa ka jingsngewbha ba kyrpang? Ha ki 10 snem jong ka jingsynshar jong phi, phi la lute ïa ka jylla, mynta phi bishni haba ngi trei na ka bynta ki paidbah. Ka BRS ka sngewkmen halor ka jingtwa jong ka lynti krem SLBC.”
