Imphal, Lber:
Ki pulit ka Manipur ki la kem ïa ki katto katne ngut ki dkhot jong kynhun lehnoh bapher bapher ha ka jingïaid lynti ha kylleng ki distrik jong ka Imphal West bad Imphal East ha ki khyndiat sngi jong mynshem taïew. Kane ka jingpyntreikam ka la thmu ïa ki briew kiba donkti ha ka jingdawa pisa, ka jingkit tiar siat, bad kiwei kiwei ki kam ba long be-aiñ.
Lah ban kdew hangne ba san ngut ki dkhot jong ka seng NRFM ki la shah kem na Gandhi Avenue, Thangal Bazar, kaba hap hapoh jong ka City Police Station ha Imphal West. Kine ki briew ki dei kiba la tip kyrteng kum u Keisham Robertson Meitei (29), u Moirangthem Tanu Devi (21), u Nameirakpam Rashini Devi (25), Meikam Ichan Chanu (32), bad u Laishram Menaka Chanu (27).
Ha kawei ka mukotduma ba kyrpang la ïoh ban kem ïa kawei pat ka lehnoh ka kynhun NRFM ba la tip kyrteng kum ka Laiphrakpam Soniya Devi (24) na Golapati Masjid Achouba Awang Leirak kaba hap hapoh Porompat Police Station ha Imphal East.
La kynnoh ba ka la dawa pisa na ki paidbah, ki kompeni shimet, bad ki heh sorkar.
Nalor kata, ar ngut ki dkhot jong ka seng PREPAK (Pro) ki la shah kem na Khongman Nandeibam Leikai kaba hap hapoh Irilbung Police Station ha Imphal East. Kine kiba shah kynnoh, kiba la tip kyrteng kum u Chirom Rostam Meitei (25) bad u Heikrujam Arvind Singh (32) ki dei ruh kiba donkti ha ki kam dawa pisa.
Kawei pat ka jingkhynra ka la pynlong ban ïohkem sa ïa ki lai ngut ki dkhot ka PREPAK (Pro) hajan ka skul Ima Medhapati ha Heinoupok, Imphal West.
La lap ba kitei ki runar kiba la shah kynnoh, ki dei kiba la tip kyrteng kum u Laishram Boboi Meitei (28), u Palujam Babu Singh (25), bad u Yumnam Athoibi Chanu, kiba dawa pisa na ki riew paidbah, ki riew shimet, bad na ki heh sorkar.
Ha kawei ka jingjia ba kyrpang, uwei u dkhot jong ka KCP (PWG) u Sorokhaibam Inaoton Singh (38) u la shah kem na khyrdop jong ka RIMS ha Lamphel.
La kem ïa u ryngkat bad ka Mobile Handset bad la kynnoh ba u donkti ban dawa pisa na ki heh sorkar bad ki riew paidbah ha Imphal bad sawdong jong ka. Uwei pat u dkhot ka KCP (PWG) uba la tip kyrteng kum u Shandham Romen Singh (39) u la shah kem na Samurou ha Imphal West.
Ki heh pulit ki la kurup ïa shiphew tylli ki shithi dawa pisa na ka jingkhmih bniah ïa u.
Ha kajuh ka por, ki don lai ngut ki shipai jong ka kynhun UPPK kiba la shah kem na Langol Type-II ha Imphal West.
La kynnoh ba ki donkti ban dawa pisa lyngba ki kam be-aiñ bad ki kynhun bym lah ban ithuh.
Ki pulit ka Manipur ki la pynjur ïa ki kam pyrshah ïa ki kynhun lehnoh kiba donkti ha ki kam runar, da kaba thmu ban khanglad ïa ka jingdawa pisa bad ban pynneh pynsah ïa ka suk ka saiñ ha ka jylla.
