Jammu, Lber:
Ka kynhun National Investigation Agency (NIA) ha ka sngi Balang ka la pynlong ïa ka jingkhynra ha ki jaka bapher bapher ha kylleng ka Jammu ha kaba ïadei bad ka jingwan rung ki lehnoh, la ïathuh ki heh jong kane ka kynhun.
Katkum ka jingïathuh jong ki heh ka kynhun, ïa kane ka mukotduma la ujor ha u snem ba la dep da kaba pynshong nongrim ïa ki jingtip halor ka jingwan rung tuh jong ki lehnoh kiba dei na ki kynhun ba la khang pyrshah jong ka Lashkar-e-Taiba (LeT) bad Jaish-e-Mohammed (JeM) sha India lyngba u pud u sam jong ka pyrthei (IB) bad u Line of Control (LoC).
Ïa kine ki jingwan rung tuh la pynsuk da ki nongïarap jong ki lehnoh ne ki Overground Workers (OGWs) bad kiwei kiwei para dkhot jong ki kynhun lehnoh kiba don ha ki shnong ha ka thaiñ Jammu, kiba la trei ban ai jingkyrshan, ka bam, ka jaka sah bad ka pisa sha ki lehnoh, la ong uwei na ki heh ka kynhun.
