New Delhi, Lber:
U MLA jong ka seng BJP, u Parag Shah, uba dei na Ghatkopar East, Maharashtra, u la shah pynbna kum u nongthaw aiñ uba riewspah tam jong ka ri India, ha kaba ki jingdon jingem jong u ki kot sha ka T.3,383 klur, katkum ka kaiphot bathymmai jong ka Association for Democratic Reforms (ADR). Ha ka jingïapher, u Nirmal Kumar Dhara jong ka BJP na Indus, West Bengal, u don ïa ka jingdon jingem kaba duna tam, kaba la pynbna, kaba long tang T.1,700.
Ka kaiphot, kaba la pynshong nongrim ha ki Affidavit ba la pynsmai hi dalade, kiba la ai shwa ka ilekshon, ka la bishar bniah ïa ki 4,092 ngut ki MLA ha kylleng ki 28 tylli ki dorbar jylla bad lai tylli ki Union Territory.
Katkum ka jingwad bniah bad ka jingïathuh jong ka ADR, la ong ba 10 ngut ki MLA ba riewspah tam ha India, ki kynthup, ïa u Parag Shah (BJP, Maharashtra) da T. 3,383 klur, u D.K. Shivakumar (INC, Karnataka) da T. 1,413 klur, u K.H. U Puttaswamy Gowda (Laitluid, Karnataka) da T. 1,267 klur, u Priyakrishna (INC, Karnataka) da T. 1,156 klur, u N. Chandrababu Naidu (TDP, Andhra Pradesh) da T. 931 klur, u Ponguru Narayana (TDP, Andhra Pradesh) da T. 824 klur, u Y.S. Jagan Mohan Reddy (YSRCP, Andhra Pradesh) da T. 757 klur, u V. Prashanthi Reddy (TDP), Andhra Pradesh da T. 716 klur, u Jayantibhai Somabhai Patel (BJP, Gujarat) da T. 661 klur bad ka Suresha B.S. (INC, Karnataka) da T. 648 klur.
Kumjuh ha kawei pat ka liang, katto katne ngut ki MLA kiba don ka jingdon jingem kiba hapoh T. 1 lak ki kynthup ïa uba duna tam uba dei u Nirmal Kumar Dhara (BJP, West Bengal) da T. 1,700, u Narinder Pal Singh Sawna (AAP), Punjab da T. 18,370, u Narinder Kaur Bharaj (AAP, Punjab) da T. 24,409, u Mehraj Malik (AAP), Jammu & Kashmir da T. 29,070, ka Pundarikakshya Saha (AITC, West Bengal) da 30,423, u Anil Kumar Anil Pradhan (SP, Uttar Pradesh) da T. 30,496, ka Sanjali Murmu (BJP, Odisha) da T. 35,076, ka Chandana Bauri (BJP, West Bengal) da T. 62,296, ka Nandita Debbarma (Tipra Motha, Tripura) da T. 63,000 bad u Ramvriksh Sada (RJD, Bihar) da T. 70,000
Ki bynta ba kongsan kumba la pynpaw da ka kaiphot, ka la ong ba ki jylla jong ka thaiñ ba shaphang Shathie jong ka ri kiba don ïa ka thup jong ki MLA kiba riewspah ki bun eh ha Karnataka bad ka Andhra Pradesh. Ka BJP ka don ïa u MLA uba riewspah bad uba duk tam ha ka ri.
Ka jingbym ïahap ha ka liang ka jingdon pisa hapdeng ki MLA ka long kaba jur bha, ha kaba ka don ka jingïapher kaba palat T.3,382 klur hapdeng ki nongthaw aiñ kiba riewspah bad kiba duna tam.
Ka jingpule bad ka jingwad bniah jong ka ADR, kaba la pynshong nongrim ha ki affidavit ba la smai hi dalade, kiba la ai shwa ka ilekshon, ka la bishar bniah ïa ki jingpynpaw pyrthei ïa ka jingdon pisa jong ki 4,092 ngut ki MLA na ki 28 tylli ki State Assembly bad lai tylli ki Union Territory. Ka kaiphot ka la weng noh ïa ki 24 ngut ki MLA namar ki affidavit bym lah ban pule bad kam shym la ktah ïa ki hynñiew tylli ki shuki basah thylli jong ka Assembly.
Ka Andhra Pradesh ka don ïa ka thup jong ki MLA kiba riewspah tam, saw ngut na ki 10 ngut, hynñiew ngut na ki 20 ngut. Ka Andhra Pradesh, ka don hakhmat eh ha ka thup jong ki nongthaw aiñ, kiba heh spah tam, ha kaba saw ngut ki MLA, ki don napdeng ki 10 ngut kiba heh spah tam jong ka India bad hynñiew ngut, ki don ha khlieh jong ki 20 ngut, ong ka kaiphot jong ka Association for Democratic Reforms (ADR).
Napdeng ki 10 ngut ki MLA kiba riewspah tam, ka Andhra Pradesh ka kynthup ïa u N. Chandrababu Naidu (TDP, Kuppam) da T. 931 klur, ka Ponguru Narayana (TDP, ka nongbah Nellore) da T. 824 klur, u Y.S. Jagan Mohan Reddy (YSRCP, Pulivendla) da T.757 klur, u V. Prashanthi Reddy (TDP, Kovur) da T. 716 klur.
Nalor kata, sa lai ngut ki nongthaw aiñ na Andhra Pradesh ki don ha ki 20 ngut kiba hakhmat eh, kynthup, ïa u Nara Lokesh (TDP, Mangalagiri) da T. 542 klur, u Yeluri Sambasiva Rao (TDP, Parchur) da T. 295 klur, u Lokam Naga Madhavi (Janasena, Nellimarla) da T. 291 klur
Tang ki jylla Andhra Pradesh, Karnataka, bad Maharashtra ki don 76 ngut na ki 119 ngut ki nongthaw aiñ kiba heh spah ka India, kaba pynpaw ïa ka jingkiew ka bor pisa jong ki nongmihkhmat ba la jied.
Napdeng ki lai tylli, ka Karnataka ka bat ïa ka jingdon jingem kaba heh tam napdeng ki MLA jong ka, da ka jingïohnong kaba T. 14,179 klur. Bud ka Maharashtra da T. 12,424 klur, katba ka Andhra Pradesh ka ïeng ha ka T.11,323 klur. Wat la ka Karnataka ka long kaba lamkhmat ha ka jingdon jingem baroh, ka Andhra Pradesh ka tam ïa baroh ar tylli ki jylla ha ka jingdon jingem mar kyllum na ka bynta uwei u MLA, ha kaba uwei pa uwei u nongthaw aiñ ha kane ka jylla u don ïa ka jingdon jingem kaba T. 65.07 klur tyngka kaba heh tam ha India. Ka Karnataka ka bud marjan bha da kaba kamai T. 63.58 klur na ka bynta uwei u MLA, katba ka Maharashtra pat ka bud ha ka T.43.44 klur.
Haba ïadei bad ki MLA ba heh spah klur, ka Andhra Pradesh ka don 27 ngut ki nongthaw aiñ kiba don ïa ki jingdon jingem kiba palat ïa ka T.100 klur, kaba long 16% na baroh ki MLA jong ka, ka jingkheiñ kaba heh tam ha ka ri. Ka Karnataka, ka don ha ka kyrdan kaba ar, da kaba don 31 ngut ki MLA heh spah, kiba don 14% na ki nongthaw aiñ jong ka, katba ka Maharashtra, ka don 18 ngut ki MLA heh spah, kaba long tang 6% na ka ïingdorbar jong ka. Kane ka pyni ba ka spah hapdeng ki MLA ha Andhra Pradesh ka long hapdeng ki briew kiba kham duna, katba ha Karnataka pat ka spah ka kham saphriang.
Ka Tripura, Manipur, bad Puducherry ki dei ki ri kiba duna tam ha ka jingdon jingem baroh napdeng ki MLA ha India. Ka Tripura ka don ha ka kyrdan kaba ha trai duh, ha kaba ki 60 ngut ki MLA jong ka ki la pynbna ïa ka jingriewspah baroh kaba long tang ?90 klur, bud sa ka Manipur kaba don T. 222 klur ha kylleng ki 59 ngut ki MLA bad ka Puducherry kaba don T. 297 klur napdeng ki 30 ngut ki MLA. Ha kaba ïadei bad ka jingkheiñ kyllum jong uwei pa uwei u MLA, ka Tripura ka ïoh biang ïa ka jingkheiñ kaba duna tam ha ka T.1.51 klur, bud sa ka West Bengal ha ka T.2.80 klur bad ka Kerala ha ka T.3.13 klur. Kine ki jingkheiñ ki ïapher bak-ly-bak na ki jylla kum ka Andhra Pradesh bad Karnataka, ha kaba ka jingdon jingem jong uwei u MLA ka palat ïa ka T.60 klur, kaba pyni ïa ka jingïapher kaba khraw ha ka ïoh ka kot hapdeng ki nongmihkhmat ba la jied ha kylleng ka ri India .
