Guwahati, Lber:
Ïa baroh hynñiew ngut ki nongïarap jong u nongïalap niam bad u MP jong ka Khadoor Sahib u Amritpal Singh la rah sha Punjab na ka kad liengsuiñ Dibrugarh ha Assam ha ka sngi Palei hadien ba la aiti sha ki pulit jong ka Punjab.
Ki hynñiew ngut kiba la shahkem ki la shah pyllait noh hadien ba la kut ka por ba ki shah set katkum ka National Security Act (NSA) bad ki la shah kem ha ki pulit ka Punjab ha kawei pat ka mukotduma.
Ha ka sngi Palei, ki bor synshar ki la pyndep ïa ka jingpynkynriah ïa ki hynñiew ngut ki nongïarap jong u Amritpal Singh.
Ki la kit ïa ki ha ki ar tylli ki liengsuiñ na ka kad liengsuiñ ha Dibrugarh.
Katkum ka khubor, ka kynhun jong ki pulit ka Punjab kaba don 25 ngut ki la poi ha Assam ha ka lah sngi U Blei bad pan jingbit na ka bynta ban set ïa ki hadien ba ki la shah pynkynriah sha Dibrugarh Central Jail ha u bnai Lber, 2023.
Hadien ba ki la mih na phatok Dibrugarh Central Jail, ka kynhun pulit jong ka Punjab, kaba la ïalam da u Superintendent of Police (SP) u Harinder Singh Gill, ka la shimti ïa ki nongïarap jong u Singh.
Kine ki hynñiew ngut kiba la shahkem ki dei kiba la tip kyrteng kum u Daljit Singh Kalsi, Kulwant Singh Dhaliwal, Gurmeet Singh Bukkanwala, Harjit Singh, Bhagwant Singh ba la tip ruh da ka kyrteng sin kum u Pradhan Mantri Bajeke, Basant Singh, bad u Gurinderpal Singh.
U Gurmeet Singh, u Bhagwant Singh, u Daljit Singh Kalsi bad u Basant Singh ki la shah pyllait noh ha ka lah sngi U Blei bad sngi Ba-ar.
Ha ka sngi Balang, u Kulwant Singh, u Harjeet Singh, bad u Gurinder Pal Singh, ki la shah pyllait noh.
Katkum ka tyllong khubor ba la ïoh lum, la ong ba kin sa pyni hakhmat ka ïingbishar ha Amritsar distrik. Katba ka sorkar kan dang bteng ban set ïa u Amritpal Singh, u Papalpreet Singh, bad u Varinder Singh hapoh ka jingtreikam ka NSA, ha kaba ka jingset ïa ki ka dei ban kur ha u Jylliew, 2025.
Ha u snem ba la lah, u Amritpal, u la long u dkhot jong ka Parliament, da kaba ïakhun ïa ka ilekshon, na Khadoor Sahib Lok Sabbha konstitwensi, hynrei, um shym la lait satia na phatok.
