Raipur, Lber:
Ki la don kumba 30 ngut ki lehnoh Maoist bad uwei u shipai kiba la ïap ha ki jingïasiat kaba la jia ha Bijapur bad Kanker distrik jong ka Chhattisgarh ha ka sngi Palei, la ong ki heh pulit. Kane ka jingïasiat ha Bijapur ka la jia ha ka por 7 baje eiei mynstep hadien ba ka kynhun ba la ïatreilang jong ki shipai kiba don haduh 1,500 ngut na ka Bijapur bad Sukma District Reserve Guard (DRG), Special Task Force (STF), Central Reserve Police Force (CRPF), CoBRA (Commando Battalion for Resolute Action) ki la pynlong ïa ka jingleit thwet lehnoh ha ka khlaw kaba don ha khappud jong ka distrik bad ka Dantewada kaba don marjan.
“La ïoh ban tam ïa ki met ïap jong ki 26 ngut ki lehnoh Naxal na katei ka jaka. La ïoh ban kurup ruh shibun ki suloi AK-47, kumjuh ruh ki tiar siat kiba long Automatic bad Semi-automatic. Uwei u shipai langrut jong ka Bijapur DRG ruh u la duh ei ïa la ka jong ka jingim ha katei ka jingïasiat” ong u IGP jong ka Bastar u Sundarraj P. Une u shipai langrut uba la khlad noh la tip kyrteng kum u Raju Oyami.
Ha ka jingjngai kaba 200 km eiei, ka jingïasiat ka la jia ha kawei ka khlaw kaba don harud khappud jong ka Kanker bad Narayanpur distrik ha ka por kumba 8 baje mynstep ha kaba ka kynhun ba la ïatreilang jong u DRG bad Border Security Force (BSF), kaba don 700 ngut ki shipai, ka la mih ban pynlong ïa ka jingleit khynra pyrshah ïa ki Maoist, la ong u Superintendent of Police (SP) jong ka Kanker u Indira Kalyan Elesela.
“Ïa ki metïap jong ki saw ngut ki Naxal bad ki tiar siat kiba long Automatic la ïoh ban kurup na ka jaka ba la don ka jingïasiat. Ngi la ïoh kurup ïa kawei ka suloi Automatic kaba mut ba don u heh nongïalam jong ka kynhun ki Maoist uba la shah siatïap ha ka jingïaleh. Ka jingkhynra ka dang ïaid shakhmat” u la ong.
Ki ar tylli ki jingïasiat ki long shi bynta jong ki jingïaleh kiba jop pyrshah ïa ki Maoist ha Chhattisgarh hapoh shisnem.
Naduh u bnai Nohprah 2023, ka la don ka jingkiew kaba shai bha ha ka jingïakhun na ki shipai ïada ri, kum shi bynta jong ka thong jong ka sorkar pdeng ban pynduh pyndam noh ïa ka LWE ha ka 31 tarik u Lber, 2026. Ha u snem ba la dep, ki bor pahara ki la pynïap ïa 219 ngut ki Maoist ha ka jylla, kaba kham bun ban ïa ki 22 ngut kiba la shah pynïap ha u snem 2023 bad 30 ngut ha u snem, 2022.
Haduh mynta ki Maoist kiba la shah pynïap ki don 113 ngut, kane ka long mynta u snem. Ki bor pahara ki la kem ruh ïa 104 ngut ki dkhot jong ka kynhun lehnoh ha ki bynta bapher bapher jong ka ri haduh mynta ha u snem 2025 bad sa 164 ngut ki la aiti noh ïalade ha ki kti jong ka aiñ, la ong ka tyllong khubor ba la wan na ka tnat ki kam pohïing.
“Ka sorkar u Modi ka ïaid shakhmat da ka rukom leh bym don jingsngew pyrshah ïa ki Naxal bad ka shim ïa ka jingpyntreikam ka bym lah ban map pyrshah ïa kito ki Naxal ki bym leit pyndem wat la baroh ki lad ki lynti la tyrwa na ka bynta jong ki, naduh ka jingleit pyndem haduh kiwei pat ki jingai jingmyntoi kiba hadien.
Ka Bastar Division kaba kynthup ïa ki hynñiew tylli ki distrik, kiba kynthup ïa ka Bastar, ka Dantewada, ka Bijapur, ka Kanker, ka Narayanpur, ka Kondagaon, bad ka Sukma, kine ki la long ki jaka pdeng jong ki lehnoh Maoist. Ka sorkar ka la pyndonkam da ki hajar ngut ki shipai ban ïaleh pyrshah ïa ki lehnoh ha kylleng ka thaiñ kaba bun ki lehnoh kaba la tip kum ka “Red Corridor”. Ka jingïaid lynti jong ki jingïakhun ba pawnam ka long ban pynphai biang ïa ki lehnoh, ban kurup ïa ki jaka rieh tngen jong ki ha khlaw bad ban pynjulor ïa ki kut jong ki. Ka jingshah pynïap kaba bun eh jong ki lehnoh ka dei ha Bijapur mynta u snem.
Ki jingïakhun ki dei shi bynta jong ka jinghiar thma jong ka sorkar kaba kham jur pyrshah ïa ki Maoist, kaba kynthup ruh ïa ka jingshna surok bad ka jingpynpaw ïa ki projek pynroi bapher bapher ha ki jaka kiba la shah ktah ha ka LWE mynshwa. U Myntri Rangbahduh ka ri, U Narendra Modi, u dei ban leit jngoh iï ka Jylla, ha ka 30 tarik, Lber, ha kaba u lah ban plie paidbah ïa kiba bun ki projek pynroi bad ban ïakynduh ïa ki bahaïing jong kito kiba shah ktah ha ki jingshah thombor jong ki Maoist.
U Myntri Rangbah ka jylla u Vishnu Deo Sai u la ïaroh ïa kane ka jingtreikam kum ka jingjop kaba kongsan ha ka jingïakhun pyrshah ïa ki Maoist, ong ka kyrwoh ba la pynmih da ka sorkar. “Ka thma pyrshah ïa ka Maoist ha Chhattisgarh ka dang ïaid shakhmat da ka bor ba pura bad kan ym sangeh haduh ba ka jylla kan lait lut na ka jingsynshar jong ki Naxal. Ïa ka jingaiti jong ki shipai ba shlur yn ym lah ban klet lano lano ruh”, la bynrap ka kyrwoh ba la ai da u heh pulit.
