Bengaluru, Lber:
Ka jingïasuhbuit sniew ha kaba ïadei bad ki jingkynnoh ba ki don ki jingriam bad ki jingpynrung tuh ïa ki jingring sur sa shisien ka la paw biang ha ka saiñ pyrthei jong ka Karnataka.
U Myntri ka jylla u K.N. Ranjanna u la kynnoh ba haduh 48 ngut ki ‘riew saiñ pyrthei na ki seng bapher bapher ki la ngop kum ki lanot ha ka jingshah riam ha ki skhim, ha kaba ki briew, khamtam eh ïa ki kynthei, ki shah pyndonkam ban pynkhih bad buh jingma ïa ki kam saiñ pyrthei.
Kane ka kam thok sha lyndet ka long ban pyntroiñ bad khanglad ïa ki ‘riew saiñ pyrthei ba kin trei ïa ki kam kum ki nongmihkhmat ba la shahjied.
Da kaba khot ïa ka kum ka mat kaba khia, u Ranjanna u la kyntu ïa ka sorkar ban pynlong jingtohkit kaba ha khlieh duh halor kane ka kam.
Haba kren ha ka ïingdorbar thawaiñ jong ka Karnataka ha ka sngi Palei, u Ranjanna u la pynpaw ïa ka jingsngewkhia halor ka jingnang jur jong kum kine ki buit sniew ha ka saiñ pyrthei jong ka jylla. “Da kaba pynshong nongrim ha ki jingtip kiba nga don, haduh 48 ngut ki nongïalam ki la shah teh ha kane ka jingïatynjuh bor jong ki CD bad ki pen drive, kiba la pyndonkam ban pynkut noh ïa ki jingleit jingwan jong ki ha ka saiñ pyrthei. Wat ki dkhot jong ka liang pyrshah ruh ki la shah thombor,” u la pynpaw.
Shuh shuh u la dawa ïa ka jingtohkit kaba thikna na u Myntri ka tnat ki kam pohïing jong ka Karnataka u G. “Ka Karnataka ka la shah kdew kum ka ‘karkhana jong ki CD bad ki pen drive’-ym da nga, hynrei da kiba bun kiwei pat. Kane ka dei ka kam kaba khia bha. Ki don wat ki khubor ba arngut ki Myntri ba pawnam jong ka Tumakuru ki la shah kem ha kum kine ki jingjia. Mynta, ka Tumakuru ka don tang arngut ki Myntri, u Dr. Parameshwara bad ma nga. Lada nga ai jubab, yn ym lah ban pdiang. Ki snar kiba ha lyndet jong kane dei ban pynpaw pyrthei khnang ba ki paidbah kin tip ïa ka jingshisha,” u la bynrap.
U khun jong ka Ranjanna, u MLC Rajendra, u la shim khia ruh halor kane ka mat, da kaba pynpaw ba ki la don ki jingpyrshang bunsien ha kine ki hynriew bnai ba la dep ban pynngat ïa ki MLA kiba bun. U la kynnoh ba ka jingpyrshang kaba la pynbeit ryntih ka dang ïaid ban khanglad ïa ki riewsaiñ pyrthei da kaba pyndonkam ïa kum kine ki skhim.
Haba pynkynmaw ïa ki juh ki jingsngewkhia, u Myntri u Satish Jarkiholi u la pynthikna ba ki jingpyrshang ban riam ne pynngop kim dei kiba thymmai ha ka saiñ pyrthei jong ka Karnataka. “Hooid, kine ki jingriam ki dei kiba la ju pyrshang, wat lada kim ju long kiba jop. Kane ka la jia la jan arphew snem. Ki riewsaiñ pyrthei ha kylleng ki ri, la ka long na ka Congress, BJP, ne JDS,ki ju shah ktah ha kane,” u la pynpaw.
Halor ki jingeh kiba la nang jur katba nangmih ki sngi, u Myntri ka tnat ki kam pohïing u la pynbna ba ka sorkar ka la pynkhreh ban pynlong ïa ka jingtohkit kaba bniah halor kitei ki jingkynnoh. Haba kren ha ka dorbar mang tyngka jong ka ïingdorbar, u la ong, “Lada ngi kwah ban pynneh ïa ka burom jong kane ka ïingdorbar, ïa kane ka mat dei ban pynbeit katkum ka jingdonkam. Lada u Ranjanna u ai ïa ka jingkyrpad kaba pura, ngan hukum ïa ka jingtohkit kaba hakhliehduh. Ka jingshisha ka dei ban paw shabar.”
