Mumbai, Lber:
Ki pulit ki la thaw ïa ki 18 tylli kynhun ba kyrpang ban thwet bad kem ïa kiba donkti ha ki kam thombor ha Nagpur ha Maharashtra, la ïathuh ki heh pulit ha ka Sngi Palei. Haduh mynta, la kem haduh 69 ngut ki briew ha kaba ïadei bad katei ka kam thombor kaba la jia hangne ha ka Lah Sngi U Blei.
Ka jingkhang dam ka dang sah ha ki katto katne ki jaka jong ka nongbah ha ka sngi kaba lai ha ka sngi Palei. Ki pulit haduh mynta ki la ithuh ïa 200 ngut kiba shah kynnoh bad ki dang trei shitom ban ithuh sa 1,000 ngut kiba shah kynnoh kiba la paw ha ki dur CCTV ha ka por ba don ka jingkulmar, la ong u heh ophisar.
Ha ka Lah Sngi U Blei, ki la don kumba 5 tylli ki jingujor ejahar ha ki thanat Ganeshpeth bad Kotwali ha kaba la pynpaw kyrteng ïa ki 200 ngut kiba shah kynnoh. Ka jingtrei shitom ka dang bteng ban lah ban ithuh ïa kiwei pat kiba donkti ha ka jingïakynad da ka jingïarap jong ki CCTV, la ong u heh pulit.
U Commissioner jong ki pulit ka Nagpur u Dr Ravinder Kumar Singal ha ka Sngi Balang u la ïathuh ha ki nongthoh khubor ba ki kynhun ba kyrpang ba la thaw ki kynthup ïa ki pulit na Ganeshpeth, Kotwali bad Tehsil Police Station, ha ryngkat ka Crime Branch.
Ki pulit ki la pynsapra ïa u paidbah uba la pynkhihwin katba ka jingïakynad hapdeng ki jaitbynriew ka la jyllei ha ka thaiñ Chitnis park hadien ka jingïakhih jong ka VHP bad ka Bajrang Dal, ha Nagpur ha ka 17 tarik, Lber, 2025. Ki kynhun ki dang ïatreilang ruh bad ka Cyber Cell ban ïarap ban ithuh ïa ki shah suba donkti, ong uwei pat u heh pulit.
Napdeng ki 69 ngut kiba la shah kem haduh mynta ha kaba ïadei bad ka jingïakynad ha Nagpur u dei u nongïalam jong ka seng Minority Democratic Party (MDP) u Fahim Khan. Ki heh pulit kham mynshwa ki la ïathuh ba u Khan u la kynnoh ba u la ïalam ïa ka jingïakhih ha bar jong kawei ka thanat ha Nagpur ha ka Lah Sngi U Blei.
Ki jingthoh jong ki pulit ki pyni ba u Khan u la shah kynnoh kham mynshwa ha kiba bun ki kam, kynthup ïa ka jingtuh bording bad ka jingïakhih ha u snem 2023-2024.
Ka kynhun jong ki briew kiba don 50 haduh 60 ngut hapoh ka jingïalam u Khan, ki la ïalum beaiñ shabar jong ka Ganeshpeth Police Station ha ka Lah Sngi U Blei bad ki la aiti ïa ka dorkhas pyrshah ïa ka jingïakhih jong ka Vishwa Hindu Parishad kaba la jia kham mynshwa ha katei ka sngi, ong ka ejahar kaba long pyrshah ïa u.
Hadien kata, u Khan bad 8 ngut kiwei pat ki la leit sha ka thaiñ Bhaldarpura ha kaba 500 haduh 600 ngut ki briew na ka jaitbynriew rit paid ki la ïalum lang hajan ka Shivaji Maharaj Chowk. Hadien la kem ïa u, ong uwei u heh pulit.
Haba kylli, hato u Khan u dei u nongïalam ïa katei ka jingïakynad, u Singal ha ka sngi Balang u la ong ba ka jingtohkit ka dang ïaid ban lap ïa ki nongthombor bad ïa ka bynta jong ki briew kiba la kdew kyrteng ha ka FIR.
Ki 33 ngut ki pulit, kynthup ïa lai ngut ki ophisar ba don kyrdan DCP, ki la mynsaw ha ka miet jong ka lah sngi U Blei, haba ki paidbah ki la pynibor, ki la pynjulor ïa ki kali, ki la siat bom petrol bad ki maw ïa ki pulit, bad ki la pynjulor ïa ki ïing briew.
Ki khubor hamsaïa shaphang ka ‘chadar’ kaba don ki jingthoh bakhuid ba la thang ha ki jingïakhih ba la lamkhmat da ka VHP ban wad ban weng noh ïa ka jingtep jong u syiem Mughal Aurangzeb, kaba don ha Chhatrapati Sambhajinagar distrik, ka la long ka jingjia kaba hashwa kaba la wanrah ïa ka jingïakynad.
Ki don ruh ki nongleh kam sniew kiba la kynnoh ba ki la leh tohmet bad khlem akor ïa kawei ka pulit kynthei bad ki la pyrshang ban loit ïa ki jaiñ phong jong ka ha ka por ba don ka jingïakynad, katkum ka jingong jong ka jingmudui ejahar.
