Aizawl, Lber:
Ka komiti pdeng jong ka Young Mizo Association, lane ka Central YMA (CYMA), ka la kyntu ïa u Myntri ka tnat ki kam pohïing jong ka sorkar pdeng, u Amit Shah, ba un pynbeit thymmai ïa ka rai jong ka sorkar kmie ban ker kynroh ïa u pud Indo-Myanmar bad weng noh ïa ka jingsynshar laitluid bad ka ri ba marjan, la ong uwei u nongïalam ka CYMA ha ka taïew ba la lah.
Katkum ka jingkheiñ briew jong u snem 2011, ka YMA ka dei ka seng bhalang kaba heh tam ha Mizoram, kaba don palat 4 lak ngut ki dkhot na ka jingbun briew jong ka jylla kaba la jan dap 11 lak ngut.
U General Secretary ka CYMA u Malsawmliana u la ïathuh ha kawei ka tnad treikam ba ki nongïalam jong katei ka seng ki la ïakynduh ïa u Shah ha ka jingleit jngoh jong u sha kane ka jylla ha ka sngi Saitjaiñ jong ka taïew ba la lah bad ki la ai ruh ïa ka jingthoh ba kyntu ïa u ban sangeh noh ïa ka jingker kynroh ïa u khappud Indo-Myanmar bad ban pyrkhat biang ïa ka jingthmu ban weng noh ïa ka FMR.
Ka dorkhas ka la ong ba ka jingthmu ban pynduh noh ïa ka FMR bad ban ker kynroh ïa u pud u sam jong ka pyrthei kan ktah jur ïa ka jingïadei kaba kongsan jong ka jaitbynriew bad ka kolshor hapdeng ki jaitbynriew Mizo jong ka ri India bad Myanmar bad kumjuh ruh ïa ka kamai-kajih jong ki.
Ka la ong ba ka FMR ka la long ka lad kaba kongsan bha ha kaba pynneh ïa ka jingïadei jaitbynriew bad ka kolshor bad ban pynroi ïa ka jinglong sngewshipara hapdeng ki jaitbynriew Mizo jong ki ar tylli ki ri.
“Ka jingthmu ban pynduh noh ïa ka FMR bad ka jingpyntreikam ïa ka jingker khappud kan ktah jur ïa ki jingïadei ba kongsan jong ka jaitbynriew bad ka kolshor, kan pynthut ïa ka jingïalong kawei bad ka jingïakylliang kolshor kaba la long ka bynta kaba kongsan ha ka jingim jong ki Mizo. Ngi ngeit skhem ba ka jingpynduh noh ïa ka FMR bad ka jingtei ïa ki jingker khappud kan ym pynthut ruh tang ïa ka jingim bad ka kolshor, hynrei ïa ka jingim bad ka rukom im jong ki jaitbynriew Mizo na baroh arliang,” la ong ka dorkhas.
Ka Mizoram ka la ai jaka sah ïa kumba 40,000 ngut ki nongphetwir na ka jylla Chin jong ka Myanmar, kiba don ka jingïadei jaitbynriew bad ki Mizo, naduh ba ki shipai ki la shimti ïa ka ri ba marjan ha u snem 2021.
Nalor kane, ka jylla ka pdiang ruh ïa ki 2,000 ngut ki phetwir na ki thaiñ Chittagong Hill Tracts (CHT) jong ka Bangladesh bad 12,000 ngut ki briew kiba la phetwir na ka jylla Manipur ne ki Internally Displaced People IDP. Ka jingthoh jingkynmaw ka la kyntu ïa ka sorkar pdeng ban pynïar ïa ki jingïarap bad ban ai pisa shuh shuh ban kyrshan ïa ka jingpyrshang jong ka YMA bad kiwei kiwei ki seng ha kaba ai jingïarap ïa ki nongphetwir bad ki IDP.
Ka CYMA ka la buh ruh ïa ki katto katne ki jingdawa, kynthup ban pynbha ïa ka kad liengsuiñ Lengpui, ban mang pisa shuh shuh na ka bynta ban ïakhun pyrshah ïa u drok, ban pynrung ïa ka ktien Mizo ha ka 8th schedule bad ban thaw ïa ka kynhun shipai Mizo hapoh ka Border Security Force (BSF).
U Malsawmlian u la ïathuh ba u Shah u la pynthikna ïa ki ban pynbha ïa ka kad liengsuiñ ha Lengpui, ïa kaba yn pyntrei da ka Airports Authority of India (AAI) bad ïa katei ka kam yn pyndep hapoh hynriew bnai. U Shah u la ïathuh ha ki nongïalam ba ka sorkar pdeng kan ai jingïarap pisa sha ka sorkar jylla ban ai jingïarap ïa ki lanot bad ki IDPS, u la ong.
Ha kaba ïadei bad ka jingweng noh ïa ka FMR bad ban pynïeng ïa ka jingker khappud, u Myntri ka tnat ki kam poh ïing u la pyntip sha ki nongïalam ka CYMA ba ka donkam ban ïapyrkhat sani bha bad u la ai jingmut ïa ki ba ki dei ban phah ïa ki nongmihkhmat sha Delhi, ong u Malsawmliana.
