Guwahati, ïaïong:
Ka sorkar Assam, ka la ïathuh ha ka Gauhati High Court, kan sa aiti ïa ka jubab jong ka, ha ka kynhun jong ki mukotduma kiba ïadei bad ka jingmyntoi paidbah, kaba kynnoh ïa u Myntri Rangbah ka jylla, u Himanta Biswa Sarma, ba u kren ïa ki kyntien “kiba ktah matïong”.
Ka ïingbishar ba la ïalam da u Chief Justice Ashutosh Kumar bad u Justice Arun Dev Choudhury ki la buh por ïa ka jingbishar kaba bud ha ka 28 tarik u Jymmang. Ka ïingbishar ka la buh jingthoh ïa ka jingkular jong ka jylla, kaba ong: “ïa ka jubab ban pynshisha la dei ban buh ha ka tarik kaba bud, ha kaba ïa ka kopi la phah sha ka kynhun na ka bynta ki nongmudui”.
Ïa ki PIL la shim nyngkong eh ha ka 26 tarik u Rymphang, ha kaba ka ïingbishar ka la ïohi ïa ka jinglong ha katei ka kam bad ka la pynmih ïa ki jingpynbna sha u Sarma, sha ka sorkar pdeng, sha ka sorkar jylla bad sha u Director General of Police.
Kane ka jingbishar ka wan ha ka por jong ka elekshon sha ka ïingdorbar thawaiñ kaba dang shen, ha kaba ka jingthep vote ka la long ha ka 9 tarik u Ïaïong bad ka jingñiew vote kan long ha ka 4 tarik u Jymmang.
Kawei na ki dorkhas ka dei kaba la mudui da u Hiren Gohain uba la ïoh khusnam na ka Sahitya Akademi, u DGP barim u Harekrishna Deka bad u nongthoh khubor ba rangbah u Paresh Malakar. La wanrah ruh ïa ki dorkhas ba kyrpang da ka seng Communist Party of India bad ka Communist Party of India (Marxist). Ka CPI(M) ka la jer kyrteng ïa ka Bharatiya Janata Party kum ka nongmudui, hynrei ka High Court ka la kyntait ban ai jingpynbna sha katei ka seng ha kane ka kynti.
Kham mynshwa, ha ka 16 tarik u Rymphang, ka ïingbishar bahakhlieh duh jong ka ri India, ka la kyntait ban pdiang ïa ki jingkyrpad kiba kum kine, halor ka durkhih, kaba la shah pyndam noh mynta, ha kaba la kynnoh ba ka pyni ïa u Myntri Rangbah, uba siat suloi ïa ki dkhot jong kawei ka kynhun jaitbynriew.
Ka ïingbishar kaba la khlieh da u Chief Justice Surya Kant, ryngkat bad ki Justice Joymalya Bagchi bad u Vipul M Pancholi, ki la bthah ïa ki nongmudui ban leit sha ka Gauhati High Court bad pan ban pynkloi ïa ka jingbishar.
Ki nongmudui ki la kynthoh ba ka jingkren jong u Sarma ka lah ban pynjylliew ïa ka jingïapher ha ka imlang sahlang. Kawei ka jingkyrpad ka la kynnoh ba u Myntri Rangbah “u la kam ba u la bthah ïa ki dkhot jong ka seng saiñpyrthei jong u ban thmu ban ujor pyrshah ïa ki Muslim kiba dei na ka jaitbynriew Bengali… da ka jingthmu ba shai ban pynlong ïa ki ban shah pyndik bad shah pynshitom”.
Ki dorkhas ki kynnoh shuh shuh ba u Myntri Rangbah u “pynjakhlia ïa ka kam ba ha khliehduh jong u ha ka Riti synshar” da kaba don bynta ha ka jingkren shun kaba paw pyrshah ïa ka jaitbynriew rit paid”, bad kynnoh ïa u ba u pynmih ïa ki jingkren kiba lah ban pynmih ïa ka jingsngewpher jaitbynriew, ka jingpynsangeh ïa ka imlang sahlang bad ka ïoh ka kot, bad ka jingbym ïasngewthuh jingmut ha ka imlang sahlang.
Ki la pan ruh ïa ka jingtohkit da ka kynhun tohkit ba kyrpang ba la ïalam da u nongbishar ba la shongthait jong ka ïingbishar ba hakhliehduh, da kaba kynthoh ba “wat hapdeng ki jingkren ba la pynphriang bad la shon paidbah… ym shym la buh jingthoh ïa ka jingmudui ejahar ba na ki bor synshar jylla”.
