Imphal, Lber:
Ka kynhun ba la pynïasoh lang jong ki shipai ka sorkar pdeng bad ki pulit ka Manipur ha ka sngi Thohdieng ki la kem ïa uwei u briew ba la kynnoh ba u dei dkhot jong ka kynhun ba la shahñiew beaiñ ka Revolutionary People’s Front (RPF) ha ka ktem lehnoh kaba don ha Imphal East jong ka Manipur.
Ka kaiphot ba la pynbna paidbah, ka ïathuh ba kane ka kynhun ba la ïatreilang, ka la ïoh ban kem ïa uwei u dkhot ka kynhun RPF/PLA, u Laishram Romen Meitei (46 snem ka rta) uba dei u nongshong shnong jong ka Uchol Makha Leikai, ha ka jingkhynra ha Uchol Makha Leikai kaba hap hapoh jong ka Andro Police Station ha Imphal East District ha ka mukotduma dawa pisa.
Ki bor pahara ki la kurup ïa ka Mobile Phone bad ka Wallet na ka kti jong u, la bynrap shuh shuh ka khubor.
Ha kajuh ka por, ka PLA/RPF ha ka kyrwoh ba la pynlait ka la pynpaw ba kane ka kynhun kam don jingïadei bad u Ayekpam Abi (40 snem) uba la sin kyrteng u Rabi, u Ayekpam Kumarjit (46 snem), bad u Konjengbam Abinas (24 snem) uba la ju sin kum u Ibungo.
Ka kyrwoh ba la pynmih da u nongïarap jong u nongthoh khubor jong ka u Bangkim, ka la pynshai ba ki lai ngut kiba ki pulit bad ki bor pahara ki la pynlong kum ki RPF/PLA ba rieh kim don jingïadei bad ka kynhun ha kano-kano ka rukom.
Ha kaba ïadei bad kane ki kynhun shipai ha ryngkat ka jingïatreilang bad ki pulit ki la bteng ban pynlong ïa ka jingtohkit kaba bniah ban lap ïa ki jingshisha bad ban tohkit bniah ïa kiba shahkem khnang ban lah ban pyntikna ba ki dei shisha ne em ki dkhot jong ka kynhun bad kumjuh lada ki dei ban wadlad ha ka ban kem sa ïa kiwei pat.
