Guwahati, Lber:
U MP ka Congress u Gaurav Gogoi ha kine ki khyndiat sngi ba la leit, u la kyntu ïa u Myntri Rangbah ka Assam u Himanta Biswa Sarma ba un pynshai lada ki paidbah ka Assam ki shah ïalam bakla ha ka rai jong ka kynhun Myntri ka sorkar pdeng ban buh ïa ka karkhana Urea ha Namrup namar ba ki juh ki jingpynbna ki la don ha u snem 2015 bad 2017.
U Gogoi u la pyntip ba ha u snem 2015 hapoh ka jingïalam jong u Myntri Rangbahduh u Narendra Modi, ka Cabinet Committee on Economic Affairs ka la mynjur ban thaw ïa ka Brownfield Ammonia-Urea Complex kaba thymmai, ka Namrup Unit IV ha Assam.
Shuh shuh ha u snem 2017, ka sorkar pdeng ka la pynbna da T.7200 klur na ka bynta ka Namrup Unit 4 ha Assam, la ong u Gogoi.
U Gogoi u la ong shuh shuh ba, ha ka jingïalang jong ka kynhun Myntri ba dang shen u Myntri Rangbahduh u la kren biang ïa ka rai jong u ha u snem 2015 ban mynjur ïa ka jingtyrwa ban buh ïa ka Brownfield Ammonia-Urea Complex kaba thymmai hapoh ka jaka ba la don lypa jong ka Brahmaputra Valley Fertilizer Corporation bad u la pynkiew ïa ka pisa sha ka T.10,601 klur.
U Myntri Rangbah ka jylla u Himanta Biswa Sarma u dei ban pynshai lada ki paidbah ka Assam ki shah ïalam bakla ha ka BJP”, bynrap biang u Gogoi.
Ka jingdon jong ki karkhana pynmih sboh kin ïarap shibun ha ka thung ka tep khamtam ïa ki nongrep kiba donkam ïa ka sboh ha kano kano ka por ba ki donkam ban thung ïa ki jingthung katkum ki aïom bad ban lah ban kyntiew ïa ki ha ka ban lah ban pynmih bad ban pynsan ïa ki jingthung bad kumjuh ban lah ban kyrshan ïa ki ha ka kam rep kam riang jong ki.
Kaba kham pawnam ka long ba ka kynhun Myntri jong ka sorkar pdeng ba la ïalam da u Myntri Rangbahduh ka ri u Narendra Modi, ha ka sngi Balang jong ka taïew ba la lah, ka la mynjur ban buh ïa ka Brownfield Ammonia-Urea Complex ha Brahmaputra Valley Fertilizer Corporation Limited (BVFCL), Namrup, Assam ha kaba ka jinglut kaba antad kan long T.10,601.40 klur.
Kane ka karkhana kaba lah ban pynmih urea ha ka shisnem ka long 12.7 Lak Metric Tonnes (LMT), yn pyntreikam ha ka Joint Venture (JV) Model kaba don 70:30 Debt-Equity Ratio bad la khmih lynti ba yn sa pyntrei kam noh hadien 48 bnai.
