Raipur, Lber:
Katba ka jingpyntreikam ban ïakhun pyrshah ïa ki Maoist ha Chhattisgarh ka nang jur, u Myntri ka tnat ki kam pohïing u Vijay Sharma u la pynbna ïa ka ‘Surrender and Rehabilitation Policy’ kaba thymmai na ka bynta ki lehnoh kiba la leit pyndem ha ki kti jong ka aiñ ba kin shah pynbiang ïa ka bam, ka jaka sah, ka pisa, ki sap treikam, ka jaka bad ka ïing khlem jingsiew.
Haba kren ha ka jingïalang bad ki nongthoh khubor ha Raipur, u Sharma u la khot ïa kane ka “policy kaba bha tam ha ka ri” ka ban ïalam sha “kiba bun ki jingaiti lut”. Kane ka jingpynbna ka long hadien shisngi ba 30 ngut ki Maoist ki la shah pynïap ha ki ar tylli ki jingïasoat ba la jia ha Bastar.
U Sharma u la ong ba dang thaw ïa ka komiti ha ka distrik ban tip la une u briew uba wan pyndem wait u dei shisha ne em u Maoist.
“Shisien ba la rai ïa kata, na ka bynta lai snem, ka jaka sah bad ka bam kan long kaba laitluid na ka bynta lai snem.Kin ïoh T.10,000 shi bnai, kin ïaid lyngba ka jingpyntbit bad kin ïoh ïa ka jaka bad ka ïing hapoh ka skhim ai ïing jong u Myntri Rangbahduh. Kin ïoh shuh shuh ïa ki jingmyntoi ba kham bun na ka bynta ban wanrah ïa ka tiar ïaleh bad kin ïoh ruh ïa ka bai thong halor jong ki,” u la ong.
Na ka bynta ki jingleit pyndem jong kiba bun, ka bainong kan long ar shah. Ka Gram Panchayat kaba la pynbna “lait na ki Maoist” kan don ïa ki projek pynroi kiba shongdor T.1 klur “mardor” kumba la mang.
“Ka shnong kan ïoh ïa ka Mobile Network, ka laiñ bording bad hapdeng kata sa ka Solar Light. Ïa kane la leh ban pyntikna ïa ka jingwan pyndem jong kiba bun”, la ong u Myntri ka tnat ki kam pohïing ka jylla.
“Ki don ruh ki kyndon na ka bynta ki shijur kiba la shongkurim bad na ka bynta ki khun jong ki.”
Hapoh ka polisi pynbha pat kaba thymmai, ka jylla kan kyrshan ïa ka jingpule jong ki khun jong kito kiba la duh noh ïa ki kmie ki kpa na ka “jingleh donbor jong ki Naxal”.”Kito kiba la shah pynkynriah jaka namar ka jingleh donbor jong ki Naxal kin ïoh ïa ka jingïarap pisa bad ka jaka”, la ong u Sharma.
Kane ka jingkren ka long shi sngi hadien ba 30 ngut ki Maoist ki la shah pynïap ha ki ar tylli ki jingïasiat ba la jia ha Bastar, ha kaba 26 ngut ki dei kiba ha Bijapur bad saw ngut ha Kanker.
Uwei u shipai langrut uba la tip kyrteng kum u Raju Oyam jong ka kynhun pahara ba kyrpang jong ka District Reserve Guard ruh u la ïap ha ka jingïasiat bad ki lehnoh.
Katkum ka jingong u Sharma, kitei ki 26 ngut ki Maoist kiba la shah pynïap ha Bijapur, ki la ïalumlang kum shi bynta jong ka jingïalang jong ki, ka Tactical Counter Offensive Campaign (TCOC).
Ka TCOC ka dei kaba la pynlong ha ka por hapdeng u bnai Lber haduh u Jylliew haba ka kynhun jong ki Maoist ka ïalum biang.
Ha ka jingïalang bad ki lad pathai khubor kaba ki la pynlong ha ka sngi Thohdieng, ki pulit ka Bastar ki la ïathuh ba la ithuh ïa 19 ngut na ki 30 ngut ki Maoist kiba la shah pynïap.
Katkum ka jingïathuh jong u Inspector General of Police (Bastar Range) Sundarraj P, la ong ba arngut ki heh nongïalam jong ki Maoist, kiba kynthup ïa u Lokesh uba dei u Platoon Commander jong ka PLGA Company No. 5 bad u Sitto Kadti uba dei u dkhot jong ka Divisional Committee, la ong ba ki la ïap ha kane ka jingïasiat ba markylliang.
Ka la don ka jingthong pisa halor ka khlieh jong ki da T.8 lak.
U Maoist uba la leit pyndem, u Oyam u la long shi bynta jong ka kynhun pyrshah Maoist DRG ha u snem 2020. La pynlong ïa ka jingpyndeng syntiew na ka bynta jong u ha Bijapur ha ka sngi Thohdieng.
“Kane ka jingpyntreikam jong ki shipai ka la ktah jur ïa ka West Bastar Division jong ki Maoist,” la ong u heh pulit.
