Aizawl, Lber:
Ka sorkar Zoram People’s Movement (ZPM) ba la khlieh da u Myntri Rangbah ka jylla u Lalduhoma ha ka Lah Sngi U Blei ka la pynkylla bad bate kam biang ïa ki hynñiew ngut ki Myntri, ba kynthup ïa u Myntri ka tnat ki kam pohïing u K. Sapdanga.
Ka jingpynbna ba la pynmih da u State Chief Secretary u Khilli Ram Meena ka la ong ba ïa ka tnat Disaster Management and Rehabilitation hashwa la bat da u K. Sapdanga, ha kaba mynta la aiti noh ha u Myntri khynah u Prof. Lalnilawma.
Une un pynïaid ïa kane ka kam nalor ki jingkitkhlieh jong u ha ka kam pynroi ha ki thaiñ nongkyndong, ka kam synshar, bad ka koit ka khiah na ka bynta ki paidbah.
U Sapdanga mynta un bat tang lai tylli ki kam- kata ha ka tnat ki kam pohïing, Urban Development bad Poverty Alleviation, bad Personnel and Administrative Reforms, la ong ka khubor.
U Myntri khynnah u Lalnghinglova Hmar un shimti ïa ka tnat ki kam jngohkai pyrthei na ka Cabinet Minister ka Lalrinpuii, kaba mynta kan bat tang ïa ka tnat ka koit ka khiah bad ka Women and Child Development, la ong ka khubor.
Nalor ka tnat ki kam jngohkai pyrthei, u Hmar un bat ruh ïa ka tnat Sports and Youth Services, Labor, Employment, Skill Development and Entrepreneurship bad ka Excise and Narcotics, la ong shuh shuh ka khubor.
Ka tnat Horticulture, ha kaba hashwa la bat da u Lalnilawma, mynta la aiti ha u Myntri ka sorkar u C. Lalsawivunga nalor ki kam ba u la don lypa- ka Art and Culture, District Council and Minority Affairs, bad ka Animal Husbandry and Veterina-ry, la ong ka khubor.
U Vanlalhlana u Myntri sorkar u la shah pynkhamti ba un khmih halor ka tnat ba dang thaw thymmai ka Information, Public Relations, Printing, and Stationery Department, hadien ba la pynïasoh bad ka Information and Public Relations Department ryngkat ka Printing and Starionery Department.
U Vanlalhlana u peit ruh ïa ki kam jong ka School Education, Higher and Technical Education, and Information and Communication Technology.
Hashwa ïa ka tnad Printing and Stationery la pynïaid da u Myntri khynnah u F. Rodingliana, uba mynta un pynleit jingmut tang ha ka tnat Power and Electricity, bad kumjuh jong ka Commerce and Industries.
