Imphal, Lber:
Ka kynhun Narcotics Affairs and Border Police (NAB) jong ka tnat pulit ka Manipur ki la kem ïa lai ngut ki briew bad ki la ïoh kurup ruh ïa 5.5 kilo u drok Heroin uba rem bha uba shong dor palat T. 5.5 klur ha ka jingkhaii drok ha kane ka thaiñ.
Da kaba pynstet ïa ka jingpyntreikam hadien ba la ïoh ïa ka jingtip kaba bniah, ka kynhun jong ka NAB ka la sdang ïa ka jingkhynra kaba stet ha ka miet jong ka sngi Ba-ar, ha kaba ka la khanglad ïa kawei ka kali kaba dang ïaid na Imphal sha Mao, ka shnong khappud ba shaphang Shatei jong ka Manipur bad ka Nagaland.
Katei ka jingkhynra, kaba la pynlong ha shilynter ka surok bah National Highway-02 (Imphal sha Mao) ha Imphal West District, ka la pynlong ban kem ïa lai ngut ki nongkhaïi drok bad ban kurup ïa 461 tylli ki song sabon kiba don u drok Heroin, kiba khia kumba 5.5 kilo. Ïa katei ka mar la buhrieh hapoh ka jaka shong ba shakhmat jong ka kali kaba la shah bat.
La antad ba une u drok u dei uba la kit be-aiñ sha kane ka jylla na Myanmar lyngba ka National Highway-102, kaba pynïasoh ïa ka shnong Dimapur ha Nagaland sha Moreh, ka shnong khappud ha Manipur. Ka kali ba la ïoh kurup bad ki song jong u drok ba la kurup ki don mynta ha kti jong ki pulit.
Katba ïa ki kyrteng jong ki nongkhaïi beaiñ kiba la shah kem ym pat lah ban pynpaw, la ujor ejahar katkum ki kyndon aiñ kiba ïadei, bad ka jingtohkit kaba kham bniah ka dang ïaid shakhmat. Kane ka jingtreikam ka pynpaw ïa ka jingangnud jong ki pulit ka Manipur ban tehlakam ïa ka jingkhaïi drok ha kane ka thaiñ.
