Shillong, Lber 26
Ka Lamare FC ka la jam sha ka final ha ka Maitshaphrang Cup 2025 ba la pynïaid da ka Khasi Students’ Union (KSU) Umsning Circle, hadien ba ka la lah ban pynliem noh ïa ka Ri Bhoi United FC da 4-2 kol ha ka semi final (2nd leg) na ka bynta ban tam da 4-2 ha ka aggregate ha ka Sngi Balang ha madan Umsning.
Kane ka nam jop ka la wan urlong lyngba u W. Lyngkhoi (Teng), Kevin Rymbai lem bad kawei ka jingïarap pynthep da u rangïalehkai ka liang pyrshah.
Kane ka long ka sien kaba ar ba ka Lamare ka la lah ban pynliem ïa ka Ri Bhoi United bad ha ka wat kaba nyngkong ka la jop da 1-0 kol.
Tang mar ïasdang ka jingïalehkai ka Lamare ka la ïoh ban pynkhih jar nyngkong eh lyngba u W. Lyngkhoi (Teng) ha ka minit ba 6. Kane ka kynhun ka la pynbud biang ïa ka kol ba ar lyngba ka jingïarap pynthep da u rangïalehkai ka Ri Bhoi u Taibang ha ka minit kaba 24 na ka bynta ban tam 2-0 kol ha ka kylla step.
Hadien katto-katne por ba la bteng biang ïa ka jingïakhun jong ka kylla miet, ka Ri Bhoi United ka la lah ban pynphai kylla lyngba ka penalty ba la shut da u Netiajit (55) bad u Meding Makdoh (79). Hynrei shwa ban wai ka Lamare ka la thep biang sa shi kol lyngba u Kevin Rymbai (90+3) na ka bynta ban ïoh jingjop shisyndon.
Ïa ka nam ‘Man of the Match’ la ïohpdiang da u Kevin Rymbai bad ïa ka khusnam la sam da u Bah W. Kharkrang uba long u nongtrei mon sngewbha jong katei ka thaiñ.
Kawei pat ka jingïa-khun semi final kan long ha ka Sngi Thohdieng (28 tarik) hapdeng ka Benris FC pyrshah ïa ka Sumer FC ha ka por 1 baje mynsngi.
