Itanagar, Lber:
U Lat ka Arunachal Pradesh, Lt Gen (Retd) K T Parnaik ha kine ki khyndiat sngi ba la leit, u la ban jur ïa ka jingdonkam ban don ka rukom treikam kaba pura ban ïakhun ïa ki jingeh ha ka liang ka jingïada ha ka thaiñ Shatei-Mihngi, da kaba pynpaw ïa ka jingdonkam jong ka jingshaniah paidbah, ban pynduna ïa ka jingshah thombor jong ki riew paidbah, bad ban pynneh ïa ka hok longbriew-manbriew.
Haba kren ha ka jingïalang halor ka histori ki shipai jong ka Northeast India kaba la long ha Rajiv Gandhi University (RGU), u Parnaik u la pynpaw ïa ka jingktah kaba slem jong ka jingbym shimkhia ha kane ka thaiñ, kaba la pynmih ïa ki kam lehnoh ha kine ki snem.
U la ban jur ba ban weng ïa kine ki jingeh ka donkam ïa ka jingïatreilang bad ka jingpyrkhat halor ka jingpynlong ïa ka jingsuk kaba neh. Ka jingïalang, kaba la pynlong da ka tnat Histori jong ka RGU, ka la bishar bniah ïa ka jingkylla jong ka thaiñ Shatei-Mihngi, khamtam ha ka por hadien ka jinglaitluid.
U Parnaik u la kdew ba ki rukom pyntreikam jong ka jingsynshar ki phareng bad ki buit shipai ha kane ka thaiñ ki la ïapher bak-ly-bak na kiba la pyntreikam ha kiwei pat ki bynta jong ka ri India, kaba la iehnoh ïa ka jingktah kaba neh ha ka imlang-sahlang jong ka thaiñ.
Kum u Chief Rector jong ka skulbah, u Lat u la ai khublei ïa u Vice-Chancellor jong ka RGU u Prof. S K Nayak bad ïa ka kynhun nongpynïaid iïka jingtrei shitom jong ki ban pynroi ïa ki jingïakren ha ka liang ka jingpule halor kum kane ka sobjek kaba kongsan.
Haba pynshlur ïa ki nongwad bniah kiba dang samla, u Parnaik u la kyntu ïa ki riewstad ban wad bniah ïa ki jingpule doktor ha ka histori ki shipai, da kaba ai jingmut ba ki jingïohi thymmai ki lah ban ïarap ha ka jingïada ïa ka ri bad ki buit pynïasoh.
U nonghikai barim jong ka skulbah North Eastern Hill University (NEHU) u Imdad Hussain u la ai ïa ka jingkren ba kongsan, da kaba ai ïa ki jingmut kiba kordor shaphang ka jinglong kyrpang jong ka thaiñ ha ka liang ka shipai bad ka histori.
Ka jingïalang ka la khring ïa ka jingïashim bynta kaba shlur na ki samla pule bad ki riewstad wadbniah ha kylleng ki skulbah ha ka thaiñ Shatei-Mihngi. La pyni haduh 13 tylli ki kot wadbniah, kiba pynpaw ïa ki jingmut bapher bapher bad pynroi ïa ki jingïakren kiba don jingmut halor ka histori bad ka jingïada jong ka thaiñ.
Ka jingkren jong u Parnaik ka la pynpaw ïa ka jingdonkam ban sngewthuh ïa ka histori jong ka thaiñ ban pyntip ïa ki polisi ha ka lawei bad ban pynthikna ïa ka jing-roi jingpar kaba neh katba dang pynbeit ïa ki jingeh ha ka liang ka jingïada ha ka thaiñ Shatei-Mihngi.
