New York, Lber:
Ki bor pyniaid ka US ha kane ka kynti ki la pynbna ba la lap ia ka met jong u briew 45 snem, uba la jah rngai tang hadien ka jingleit ïakynduh ‘Blind-date’ ha u bnai ba la leit.
Ia ka met jong u Marcus Freiberger la shem na uwei u lum maw ha Phoenix ha ka Sngi Balang (19 tarik, Lber) hadien kumba shi bnai duna ba u la leit ban ïakynduh ia ki briew bym don jingithuh.
Ha ka sla ‘Facebook’, ka Tina Hall, hynmen jong u Freiberger, ka la pynbna ia ka jingkhlad jong u bad pynpaw ruh ia ka jingsngewkhia kaba jur ba ka iing ka la duh noh ia u Marcus ha ka por ba khlem poi pyrkhat.
U Marcus Fregiberger, u dei u nonghikai ‘Yoga’ ha kawei ka jaka kilan met hapoh ka nongbah Arizona. Kumta, ki bor pyniaid ki dang pynlong ia ka jingtohkit kaba bniah haba iadei bad ka jingiap jong u, la ka dei ka jingshitom ne ka jingktah na ki bam kiba u bam ne ka dei ka jingdon kti jongno-jongno ban pyniap dusmon ia u.
Ka Maricopa County Office jong ki Medical Exminer, ki la pynithuh ia ka met jong u Freiberger ha ka Sngi Nyngkong hadien ba ki la ioh ban peit bniah bad wad bniah shaphang ki jingtip jong u lyngba ka ‘fingerprints’.
Kumta, na ka liang ki bahaiing jong utei u briew ki la dawa ia ki bor pyniaid ba kin pynioh ia ka hok jong u bad ban wad bniah ia ka daw jong ka jingkhlad ba kyndit jong u.
