New Delhi, ïaïong:
U Myntri Rangbahduh ka ri, u Narendra Modi, u la ong ha ka sngi U Blei ba ka sorkar Bharatiya Janata Party (BJP) ka angnud ban pynkut noh ïa ki kam pyntriem jong ki lehnoh Maoist da kaba kyntiew ïa ki jaka kiba la ju long teng ki ktem jong ki lehnoh namar ba u la kynnoh ba ka Congress ka “pynshlur” bad ai mynsiem ïa ka Left Wing Extremism (LWE).
Haba kren ha ka jingïalang ha Bilaspur distrik jong ka Chhattisgarh, u Modi u la ong ba ki rukom pyntreikam jong ki sorkar Congress ba mynshuwa ki la ai bor ïa ki kam pyntriem jong ki lehnoh Maoist bad khanglad ïa ka roi ka par jong ka jylla.
“Ha kine ki phew snem, ki kam pyntriem jong ki Naxal ka la ïoh jingkyrshan ha kiba bun ki jylla, kynthup ïa ka Chhattisgarh, namar ki rukom pyntreikam jong ka Congress. Kano kano ka thaiñ kaba sahdien ha ka roi ka par, ka kynhun Naxal ka la roi hangta, hynrei kaei kaba ka seng kaba la pynïaid ïa ka sorkar haduh 60 snem ka la leh? Ka la paw shai ba kum kine ki distrik ki kylla long kiba sahdien bad kylla long ki bym shah shim jingkitkhlieh…Ka jingïapher jong ka sorkar kaba hashwa ka long ba ka la nang ai umphniang ban pynklang ïa ka ding,” u la ong.
U Myntri Rangbahduh u la bynrap ba hapoh ka sorkar BJP “Double-Engine” ha ka sorkar pdeng bad ka jylla, ka jinglong jingman ka la nang kylla stet bad ka juk thymmai jong ka jingsuk ka la nang mih ha ki jaka ba shah ktah ha ki Maoist. “Namar ka jingpynroi bad ka jingbha jingmiat, la ïohi ïa ka juk thymmai jong ka jingsuk ha ki jaka ba shah ktah ha ki Naxal”, la ong u Modi bad bynrap ba “Ki kam pyntriem jong ki Naxal ka la ïoh mynsiem namar ki rukom pyntreikam jong ka Congress”.
Kane ka jingkren jong u Myntri Rangbahduh ka wan ha ka phang jong ka jingkiew jong ka jingleh donbor pyrshah ïa ka LWE kum shi bynta jong ka jingpyrshang jong ka sorkar pdeng ban pynkut noh ïa ki lehnoh Maoist ha ka ri haduh ka 31 tarik u Lber, 2026.
Ha ka sngi Saitjaiñ, ki bor pahara ki la pynïap ïa 18 ngut ki Maoist ha ki ar tylli ki jingïakynad jong ki Maoist ha ka jylla Chhattisgarh, kaba la pynïap ïa ka jingdon jong ki Maoist ha ka jylla ha une u snem sha ka 131 ngut.
Ka Congress ka la kyntait ïa ka jingkren jong u Myntri Rangbah, da kaba kynnoh ba u la pynmih ïa ki “jingkren lamler”. “Hashwa u Amit Shah ha kawei na ki jingïalang, u la ïathuh ha ki briew ba ka don ka jinghiar 72% ka jingshah thombor ha ki Maoist ha Chhattisgarh… Mynta u Myntri Rangbah u pynmih ïa ka jingkren kaba kum kane… Kane ka long kaba lamler bad kaba dei ban pynrem,” ong u RP Singh, heh nongïalam jong ka seng Congress bad nongkren jong ka seng.
Khyndiat kynta shwa ka jingwan jngoh jong u Modi, 50 ngut ki Maoist, kynthup ïa ki nongïalam bahakhliehduh jong ki lehnoh, ki la pyndem noh ha ka distrik Bijapur jong ka jylla, la ïathuh ki heh sorkar kiba tip bha ïa kane ka kam.
“Lai ngut ki lehnoh kiba la pyndem ki don ïa ki khusnam ba T.5 lak marwei, katba phra ngut ki don ïa ki khusnam ba T. 1 lak marwei ha ki khlieh jong ki. Ka kynhun District Reserve Guard (DRG), Bastar Fighters, Special Task Force (STF), CRPF bad ka kynhun ïaleh jong ka ka CoBRA (Commando Battalion for Resolute Action) ki la trei borbah ha kaba ïadei bad ka jingleit pyndem jong ki lehnoh,” la ong u SSP jong ka Bijapur u Jitendra Kumar Yadav.
U Myntri kam pohïing u Amit Shah u la ong ba ka sorkar pdeng ka don ha ka lynti ban pynkut noh ïa ki kam pyntriem jong ki Maoist hapoh u Lber, 2026 bad pynshlur shuh shuh ïa ki lehnoh ba kin wan pyndem wait. “Ka dei ka kam kaba sngewkmen haduh katta katta ba 50 ngut ki Naxal ha Bijapur (Chhattisgarh) ki la pyndem noh, da kaba iehnoh ïa ka lynti jong ka kam thombor. Nga pdiang sngewbha ïa kito kiba iehnoh ïa ka kam thombor bad aiti ïa ki tiar ïaleh bad ban ïasoh bad ka jingim ba bha jong ka roi ka par”, u la ong ha ka jingthoh ha ka rynsan X.
Ka Congress ka la kyntait ïa ka jingkynnoh jong u bad ka la ong ba ka ju trei na ka bynta ka bha ka miat jong ki paidbah. .
“U Modi u dei ban shim jingkheiñ ïa ka jinglong jingman ha Chhattisgarh ha ka por ba synshar ka BJP. Hangno hangno ki kam bamsap ki ïaid. Ka seng Congress ka la trei na ka bynta ki paidbah jong ka jylla bad kan sa ïai bteng ban leh ïa kata,” la ong u RP Singh.
U Myntri Rangbah ka jylla u Vishnu Deo Sai, uba la ïashim bynta lang bad u Modi, u la ïaroh ïa u Myntri Rangbahduh.
“U Modi u mane ïa kito kiba kiwei ki iehnoh beiñ. U la pyndep ïa ka jingkular jong u ban ai ïa ki ïing paka sha ki longïing kiba donkam ha ki jaka nongkyndong jong ka Chhattisgarh bad ban kyntiew ia ka jinglong jingman jong ki baroh kawei, ” u la ong.
Ha kane ka jingleit jngoh jong u, u Modi u la pyllait paidbah ruh ïa ka rel jong ka MEMU ka ban shakri ha ka bynta jong ka Abhanpur-Raipur bad u la ainam ïa ka jingpynlong bording pura ïa ka Indian Railways Network ha ka jylla.
