Agartala, ïaïong:
Katkum ka jinglum jingkheiñ jong ka sorkar, la ong ba ki la don kumba 39 ngut ki briew kiba la shahkem halor ka jingdonkti jong ki ha ki kam pynïap briew, hynrei tang 6 ngut ki dang sah ha phatok ha Tripura.
Ki la don kumba 31 ngut ki kynthei kiba la shah pynïap bad 144 ngut kiba la shah leh beijot ha Tripura ha u snem ka kheiñ ka diah 2023-24, ong ka kaiphot jong ka tnat ki kam poh ïing kaba la wanrah ha ka ïingdorbar ha ka dorbar mang tyngka kaba dang ïaid shakhmat.
Katkum ka jingkheiñ jong ka sorkar, la ong ba la kem ïa 39 ngut ki briew kiba la shah kynnoh donkti ha ka kam pynïap briew, hynrei tang hynriew ngut ki dang sahkut ha phatok.
Baroh ki la don 9,308 tylli ki mukotduma kiba ïadei bad ki kam runar pyrshah ïa ki kynthei ha kane ka jylla jong ka thaiñ Shatei-lam-Mihngi naduh u snem 2023 haduh u bnai Kyllalyngkot mynta u snem. Ïa ka jingtohkit la pynlong ha ki 8,485 tylli ki mukotduma, katba ka jingtohkit kam pat dep ha ki 823 tylli ki mukotduma ba dang sah.
Ha u bnai Kyllalyngkot, da kaba sot ïa ki jingtip ba bniah jong ka National Crime Records Bureau (NCRB), u Myntri Rangbah ka Tripura, u Manik Saha, u la ong ba ka jylla ka la sakhi ïa ka jinghiar kaba 19.3 percent ha ka jingdon ki kam runar baroh kawei ha u snem 2024 haba ïanujor bad u snem ba hashwa. Mynta ka Tripura ka don ha ka kyrdan kaba lai ha ka jingduna jong ki kam runar napdeng baroh 28 tylli ki jylla ha ka ri, u la bynrap.
Da kaba kdew ïa kajuh ka jingtip jong ka NCRB, u Saha u la kam ruh ba ki kam runar pyrshah ïa ki kynthei ki la hiar da 55 percent haba kheiñ ïa ka snem sha ka snem.
