Shillong, Ïaïong 02
Ka KSU Umsning Circle ha ka Sngi Balang ka la ïoh bat ïa kawei ka kali ‘Sumo’ kaba kit ïa 11 ngut ki bar-ri kiba na Bangladesh.
Ka jingïoh bat ïa katei ka kali kaba don ïa u nombor ML-04-B 7082 ka la jia ha ka por 2:30 baje nohphai sngi.
Hapoh ka jingïalam jong u samla Jester Nongbet kum Asst Organising Secretary ka KSU-NKHD Unit ryngkat ka jingsynran lang ki nongïalam ka KSU-Umsning Circle, ka seng ka la ïoh bat ïa katei ka kali kaba kit ïa kitei ki bar-ri kiba la phla ba ki dei na Bangladesh bad ba ki mut ban kiew sha sor Shillong.
Kine ki kynthup ïa u Sajauddin Sheik (26 snem ka rta), Panna Kamal Husein (37 snem ka rta), Rabia Begum (27 snem ka rta), Kakoli Sherda (36 snem ka rta), Erina Din Mullah (30 snem ka rta), Shobha Islam (28 snem ka rta), uwei uba 7 snem ka rta, Unjilla Sardar (27 snem ka rta), kawei kaba 15 snem ka rta, Poppi Mullah (25 snem ka rta) bad Sonia Sheik (21 snem ka rta).
“Na ka liang ka seng ka la ïoh ban bat bad la wan tuklar noh na ka liang ki pulit haba ïoh bat ïa kitei ki mynder-ri bad ka seng ka la maham jur haba ki shimti ki dei ban leh ïa kaba donkam. Ka seng ka maham ba kim bit ban kiew sha Shillong bad ba ki dei ban leit phai sha jaka ba ki wan namar ka Ri-Khasi kam dei ka jaka ban bret ïa ki mynder-ri ne ki briew ba nabar,” ong ka kyrwoh na u Information & Publicity Secretary, KSU Umsning Circle, samla Khraw Tariang.
