Gandhinagar, ïaïong:
Ki pulit ha ka sngi Ba-ar ki la kem ïa u trai jong kawei ka kudam hajan ka sor Deesa ha ka distrik Banaskantha jong ka Gujarat, katto katne kynta hadien ka jingbthei kaba jur ha ryngkat ka jingpluh ding kaba jur kaba la pynïap ïa 21 ngut ki briew, la ïathuh ki heh pulit. La kynnoh ba la buh bad shna beaiñ ïa ki bom ha katei ka kudam, ki la ong.
U Deepak Mohnani, uba dei u trai jong katei ka Godown, u la shah kem ha ka kynhun ki pulit jong ka Banaskantha na ka distrik ba marjan ka Sabarkantha ha ka miet sngi Ba-ar, la ong u Inspector General ka Border Range u Chirag Koradia.
“Ngi la kem ïa u snar, u Deepak Mohnani na kawei ka jaka ha Sabarkantha”, la ong u Range IG ha ka lad pathai khubor. Kane ka ïing buh mar ka Deepak Traders – ka dei ba la long trai da u Deepak bad u kpa jong u, u Khubchand Mohnani, la ïathuh ki heh pulit kham shwa.
Kane ka jingbthei, kaba la jia kumba 9.45 baje mynstep, ka la pynpra ïa katei ka jaka buh mar ha kawei ka karkhana hajan ka sor Deesa, kaba jngai kumba 30 km na ka jaka treikam jong ka Banaskantha.
“Baroh ki briew kiba la ïap ki dei kiba na Harda bad Dewas distrik jong ka Madhya Pradesh,” la ong u District Collector u Mihir Patel. Ha kane ka jingjia, ki don 21ngut kiba la ïap, kynthup ïa ki khynnah bad ki kynthei, katba 6 ngut kiwei pat ki la mynsaw ha ka jingjia.
“La pynthikna ïa ka jingithuh ïa ki 19 ngut ki briew, katba dang shim ïa ki DNA ban ithuh ïa arngut kiwei pat,” u la ong. Kane ka jingbthei ka long kaba jur haduh katta katta ba ka la phah ïa ki bynta jong ka met jong ki nongtrei ban her sha jngai kaba 200-300 meter.
Ka jingshah ktah ka la pynhap ïa ka RCC Slab jong ka jingtei. Wat ki bahaïing bahasem jong ki nongtrei kiba sah ha kajuh ka jaka ruh ki la shah pynlwet haduh ban da ïap hadien ba ki block jong ka Slab ki la hap halor jong ki, la ong u Collector.
