Kolkatta, ïaïong:
Kum ka jingjah burom bad ka jingduhnong ïa ka sorkar jong ka Mamata Banerjee ha West Bengal, ka Supreme Court ka la pynsah ïa ka hukum jong ka Calcutta High Court, ha kaba la weng noh ïa ka jingthung kam ïa palat 25 hajar ngut ki nonghikai bad ki bym dei ki nonghikai hapoh ka West Bengal School Service Commission.
Ka ïingbishar ba ha khliehduh ka la ong ba ka rukom jied baroh kawei ka la “pynsniew da ka jing-leh bakla bad ka jing-leh thok” bad ka jingshaniah bad ka jinglong hok jong ka ka la “pynjah burom”.
Ka kynhun nongbishar jong u Chief Justice of India u Sanjiv Khanna bad u Justice PV Sanjay Kumar ki la ong ba kim ïohi ïa ka daw ban tuklar ïa ka hukum jong ka High Court. Ka ïingbishar ka la ong ba ki jingthung kam ki mih na ka jingleh thok bad kumta ki long kiba thok.
Ka kashari ka la pan na ka sorkar jylla ban pyndep ia ka jingjied thymmai hapoh lai bnai.
Kito kiba pynkhuid ïa kane ka rukom treikam kaba thymmai kin ym donkam ban pynphai ïa ka tulop kaba ki la shim naduh ba la thung ïa ki ha u snem 2016.
Hynrei kito ki bym pynkhuid ki dei ban siew biang. Ka ïingbishar ka la ai jingpynlait ïa ki briew kiba don jingduna ha ki dkhot met bad ka la ong ba ki lah ban bteng ïa ka kam kaba ki don mynta.
Ka sorkar jong ka Mamata Banerjee ka la tuklar ïa ka hukum jong ka ïingbishar ba ha khlieh duh ha ka ïingbishar ba ha khliehduh, bad ka la pynbor ban pynïakhlad ïa ki kyrtong kiba la jakhlia bad ki bym don jakhlia.
Ka jingbym ryntih ha ka jingpynrung kam nonghikai ka la plie ïa ka jingtap jong ki wieh na ka bynta ka sorkar Trinamool Congress.
Katto katne ngut ki nongïalam ba ha khliehduh jong ka, kynthup ïa u Myntri barim ka tnat pule puthi bad u Lieutenant ba shaniah jong ka Mamata Banerjee, ki don ha phatok ha kaba ïadei bad kane ka kam.
U heh nongïalam jong ka BJP, u Amit Malviya, u la batai ïa katei ka rai jong ka Supreme Court, kum ka “jingrem kaba shyrkhei” ïa ka Mamata Banerjee.
“U nongïarap bajan jong ka Mamata Banerjee, u Partha Chatterjee-uba la shakri kum ka Myntri ka tnad pule puthi bad uba la shah kem ryngkat bad ki wad pisa-u la don lypa ha phatok namar ka bynta jong u ha katei ka kam thok.
