Chennai, ïaïong:
U Myntri Rangbah ka jylla u MK Stalin ha ka Lah Sngi U Blei u la kynthoh ïa u Myntri Rangbahduh ka ri u Narendra Modi bad ka sorkar pdeng ba kim shym la shim khia ban pynthikna ban pyllait ïa ki nongri dohkha ka Tamil Nadu bad ki lieng jong ki kiba don hapoh ka jingpeit jong ka Sri Lanka.
U Myntri Rangbah u la pynbna ruh ha ka ïingdorbar ïa ki jingai jingïarap kyrpang haduh T.576 klur na ka bynta ka bha ka miat jong ki nongtong dohkha na ki distrik ba marjan duriaw ha shilynter ka duriaw Gulf of Mannar, da kaba pynshlur ïa ki ban leit tong dohkha ha duriaw ba jylliew bad ban pynpher ïa ki lad kamai jong ki.
“Wat la ka sorkar pdeng kan leh kumno ïa ka Tamil Nadu, ngin ym sngap jar ha ka jingkular jong ngi ban ïada ïa ka jingim jong ki nongri dohkha jong ngi. Ka sorkar DMK kan ïeng beit ha ka liang jong ki”, la ong u Stalin.
Kane ka jingpynbna jong u ka long hadien shisngi ba u Modi u la leit jngoh ïa ka Rameswaram ban plie ïa ka jingkieng rel ha Pamban bad kiwei kiwei ki projek ha kaba ïadei bad ki kam pynroi.
U Stalin u la ong ba la pynmih ïa ka hukum jong ka sorkar ban shna ïa ka jaka ri dohkha ha ka jinglut kaba T.150 klur ha ka thaiñ Thangachimadam hajan Rameswaram ka ban pynsuk ïa ki nongri dohkha ban leit sha ki jingpyninam jong ki rukomk ri dohkha ha duriaw bah ha ka thaiñ ba shaphang Shathie ha Indian Ocean.
U Myntri Rangbah u la pynkynmaw ba u la dep pynbna ban tei ïa ki kad ri dohkha ha Pamban bad ha Kunthukal ha ka jinglut kaba T.60 klur bad T.150 klur.
Kine ki lad ki lynti ki long ban khanglad ïa ki nongtong dohkha jong ki jaka ba marjan duriaw ha kane ka thaiñ ban shah kem hapoh bad sawdong jong ka thaiñ Palk Bay ha ki shipai duriaw jong ka Sri Lanka halor ka jingkynnoh ba ki rung sha ki um jong ka Lanka.
Haba pynbna katkum ka kyndon 110 jong ka ïingdorbar, u Myntri Rangbah u la ong ba wat la ka ïingdorbar ka la pdiang da kawei ka jingmut ïa ka rai kaba pan ïa ki lad ki lynti ban shim biang ïa ka Katchatheevu na Sri Lanka bad ban pynthikna ïa ka jingpyllait ïa ki nongtong dohkha na India ha ka por ba u Myntri Rangbah u leit jngoh ïa katei ka ri, hynrei ka la paw ba ym shym la don satia.
“Ka jingbym pyllait ïa ki 97 ngut ki nongtong dohkha na Tamil Nadu bad ki lieng jong ki ka la pynduh jingkyrmen ïa ngi haduh katta katta,” u la bynrap.
Kiwei pat ki jingthmu ba la pynbna da u Stalin ki kynthup ia ka skhim ba kyrpang ha ka jinglut kaba T.52.33 klur ban pynsuk ïa ki 7,000 ngut ki nongtong dohkha ban ïadon bynta ha ka kam ri dohkha, ka jingpynkhreh, bad ka jingshna ïa ki mar kiba don dor.
U Stalin u la ong ba yn ai ïa ki tiar kiba shongdor T.25.82 klur ban pynlah ïa ki longïing jong ki nongtong dohkha ha kaba pyntreikam ïa ka kam ri dohkha bad kumjuh ïa kit ham.
Nalor kane, yn ai jinghikai sha ki 2,500 ngut ki dkhot jong ki longïing jong ki nongri dohkha ha ka rukom pynkhreh treikam na ka bynta ki dohkha bad ki buit ban pynkhriat ïa ki dohkha ha ka jinglut kaba T.9.9 klur.
Kawei pat ka skhim yn pyntreikam ha ka jinglut kaba T.20.55 klur ban ai jinghikai ba stad sha ki 15,300 ngut ki nongtong dohkha ha kaba pynmih ïa ki mar ba la pynshong nongrim ha ki dohkha kiba don dor.
Yn pyntreikam ïa ki skhim ba kyrpang kiba shongdor T.54.48 klur ban ïarap ïa ki nongtong dohkha ban trei ïa ka kam thaiñ jar, maramot jar, shna bad maramot lieng, pynmih dohkha ba la tyr-khong, shna Tank dohkha, jinghikai ban ñiah lieng, bad pynkhreh ïa ki tiar pynitynnad na ki shynrong mattah ban ai jingmyntoi ïa kumba 20,100 ngut ki nongtong dohkha.
Yn pyntreikam ïa ka skhim ban ai kiwei pat ki lad kamai ki bym dei na duriaw kum ka jingrep tit, ka jingpynïaid ïa ki lieng jngohkai pyrthei, ki kam shna kti, ban shna bad tylliat musla, ka jinghikai ban sumar bad pynbha briew bad ka jingpynmih ïa ki jingbam krai na ka bynta ban ai jingmyntoi ïa ki 14, 700 ngut ki nongtong dohkha.
