New Delhi, ïaïong:
U Myntri Rangbah ka Maharashtra, Devendra Fadnavis, ha ka Sngi Ba-ar u la ong ba u Narendra Modi un dang ïai neh kum u Myntri Rangbahduh wat ha u snem 2029, kaba pynkut noh ïa ki kaiphot jong ki nongmih bujli.
“Nga la ong ba kam dei ka por kaba biang ban pyrkhat ïa u nongmih bujli ïa u Myntri Rangbahduh ka ri, u Narendra Modi, namar, ha u snem 2029, u Modi, un sa long Myntri Rangbahduh biang”, la ong u Fadnavis, haba kren ha ka India Global Forum ha Mumbai.
Kane ka la jia hadien ba u Sanjay Raut u nongïalam ka Shiv Sena (UBT) u la kynthoh halor ka jingïakynduh jong u Modi ïa u Mohan Bhagwat heh duh ka Rashtriya Swayamsevak Sangh, da kaba kam ba ka RSS kan jied ïa u nongmihkhmat jong u.
U Raut u la ai jingmut ba u Modi u lah ban leit jngoh ïa ka jaka treikam jong ka RSS ha ka 30 tarik u Lber ban “thoh ïa ka aplikeshon shongthait jong u ha u bnai Nailur,” kaba mut ba don ki nongïalam ka BJP kiba shongthait ynda ki la dap 75 snem ka rta.U Modi un dap 75 snem mynta u snem.
“Ka paw ba ïa u nonghiar pateng jong u Modi yn rai da ka RSS dei na kata ka daw ba la khot ïa u Modi (sha ka ophis treikam jong ka RSS) bad ki jingïakren ki la ïaid. Ki jingïakren jong ka Sangh ki long ha lyndet ki jingkhang ba la khang. Ki dak ki shin ki long kiba shai bha. Ka Sangh kan rai ïa u nongïalam ban wan bad utei u nongïalam u lah ban dei na Maharashtra,” u la ong.
Nangta u Fadnavis u la jubab da kaba ong, “Ha ka kolshor jong ngi, haba u kpa u dang im, kam long kaba dei ban kren shaphang ka jingsynshar. Kata ka dei ka kolshor Mughal. Ka por kam pat poi ban iakren ia ka”.
U Myntri Rangbahduh, ha ryngkat ka jingsynran lang jong u heh ka RSS, u Mohan Bhagwat, u Myntri ka sorkar pdeng, u Nitin Gadkari, bad u Myntri Rangbah ka Maharashtra, u Devendra Fadnavis, ki la leit jngoh ïa ka ophis treikam jong ka Sangh bad ki la ai burom ïa u nongseng jong ka RSS, u Keshav Baliram Hedgewar ha Smruti Mandir ha Reshimbagh.
