Bengaluru, ïaïong:
Naduh ka lah sngi U Blei, ki dkhot ka BJP Karnataka kin pynlong ïa ki jingïakhih ‘Janakrosha’ ha kylleng ka jylla haduh ka 3 tarik, Jymmang, kaba kynthup ïa kawei ne ar tylli ki distrik man la ka sngi. Kane ka jingïakhih ka long pyrshah ïa ka sorkar jylla kaba la pynkiew dor ïa ki marbam ba kongsan, ka jingbuh kyrpang 4 percent ïa ki kontraktor Muslim ha ki Tender sorkar bad kiwei kiwei ki mat. Kane ka jingïakhih kan sdang na Mysuru ha ka lah sngi U Blei bad kan pynkut ha Bengaluru ha ka 3 tarik, Jymmang.
U nongïalam ka liangpyrshah ha ïingdorbar u R Ashoka u la ïathuh ha ki nongthoh khubor ba man ka por ba ka Congress ka wan ha ka bor, ka don ka jingbamsap, ka jingsynshar bymman bad ka jinglute ïa ki briew lyngba ka jingpynkiew dor. Ha kine ki 21 bnai ba la dep jong ka sorkar Congress, man la u bnai ka don ka jingkiew dor jong kawei ka mar ne kawei pat.
“Ka jingïakhih jong ngi ka long ruh pyrshah ïa ka jingpyndonkam bakla ïa ka pisa ba la mang na ka bynta ki Dalit bad ka jingleh bymhok ïa ki nongrep. Ka jingïakhih kan long ha ki saw bynta ha ki thaiñ Mysuru, Kittur Karnataka, Coastal Karnataka bad ki thaiñ Kalyana-Karnataka” u la bynrap.
U President ka BJP ka jylla u BY Vijayendra bad baroh ki nongïalam ba rangbah kin ïashim bynta ha ki jingïalang paidbah bad ïa kane ka jingïakhih yn plie lama da u Myntri ka sorkar pdeng u Pralhad Joshi ha ka lah sngi U Blei. “Ngin ïaid kjat 1 km ha man ki distrik bad nangta ngin kren sha ki paidbah halor kine ki jingeh. Ngi kwah ban poi sha man la ki thliew jong ka jylla,” u la ong.
Namar ka jingkiew dor, ka jinglut jong ki mar ki mata kynthup ïa ki jhur, ki mar rep bad kiwei kiwei ki mar ba donkam ka la kiew. “Ka sorkar ka la pynkiew ïa ka dor jingpynïaid ïa ki mar ki mata, ka bai bording, ka bai bus bad metro, ka bai kolej sorkar bad kiwei kiwei”, u la bynrap.
