Srinagar, ïaïong:
U Myntri ka tnat ki kam pohïing ka sorkar pdeng u la pynïaid ar tylli ki jingïalang hangne ha ka sngi Ba-ar ban bishar bniah ïa ki kam pynroi kiba dang ïaid shakhmat bad ka jinglong jingman jong ka jingshngaiñ ha Jammu & Kashmir.
Ki la ïathuh ruh ba u Lieutenant-Governor u Manoj Sinha bad u Myntri Rangbah ka jylla u Omar Abdullah ki la don lang ha kane ka jingïalang, ha kaba la ïashim bynta ruh da ki heh ophisar na ka tnad kam pohïing jong ka sorkar pdeng bad ka sorkar Jammu & Kashmir.
Ïa kane ka jingïalang bishar bniah ïa ka roi ka par kaba la neh ar kynta la bud sa kawei pat ka jingïalang ban shim jingkheiñ ïa ka jinglong jingman jong ka jingshngaiñ ha ka Union Territory. Ka jingïalang kaba ar ka la neh ar kynta shiteng.
Hynrei u Myntri Rangbah ka jylla u Abdullah um shym la don bynta ha ka jingïalang ban bishar bniah ïa ka jingïada kaba la ïashim bynta da ki heh ophisar na ki pulit bad kiwei kiwei ki tnad pahara kynthup ïa ki shipai, la ong ki heh sorkar.
U Myntri ka tnat ki kam pohiing u la ïaroh ïa ka jingtrei jong ki tnad pahara ban pynneh ïa ka jingsuk ha Jammu & Kashmir bad u la ong ïa ki ban pynjur ïa ka jingpahara. U Shah uba la poi ha ka Valley ha ka janmiet jong ka lah sngi U Blei, u la ïakynduh ïa ki katto katne ngut ki briew kynthup ïa ki nongïalam na ka BJP bad ki seng kiba ïatreilang kum ka JD(U).
Khlem da pynslem hadien ba u la poi ha ka lah sngi U Blei, u Myntri ka tnat ki kam pohïing u la leit jngoh ïa ka ïing jong u Humayun Muzammil Bhat uba la ïoh ïa ka khusnam Kirti Chakra uba la aiti ïa la ka jingim haba ïakhun pyrshah ïa ki lehnoh ha u snem 2023.
U la pynlut por haduh 20 minit eiei bad u kpa jong utei u heh pulit uba la shah pynïap, u Ghulam Hassan Bhat, Inspector General of Police, uba la shongthait, hashwa ba un leit sha Raj Bhawan.
Hadien ka jingïap jong u, u Bhat u la ïoh ïa ka khusnam Kirti Chakra, u dei uwei na ki saw ngut ki shipai pahara kiba la khlad noh haba ïakhun pyrshah ïa ki lehnoh ha ki khlaw ba rben ba ker sawdong ïa ka shnong Gadool jong ka Kokernag kaba don ha Anantnag distrik kaba don ha ki bynta ba shaphang Shathie jong ka Kashmir ha u Nailur jong u snem 2023.
La pynkhlaiñ ïa ka jingpahara ha kylleng ka Kashmir ha ka jingleit jngoh jong u Shah ryngkat bad ki shipai kiba don tiar ïaleh kiba la pyntreikam bun.
