Guwahati, ïaïong:
Ki pulit ka Assam ha ka Lah Sngi U Blei ki la ïoh pyllait im ïa ar ngut ki khynnah kynthei kiba jah na kawei ka hotel kaba don hajan ka jaka Bora Service ha Guwahati, la ïathuh uwei u heh pulit. Hadien ka jingujor jong ki longïing ha Paltan Bazar Police Station, ki pulit ki la pynlong ïa ka jingkhynra bad wad ïa ka jaka ba don ki khynnah kynthei kiba jah.
U heh pulit u la ïathuh shuh shuh ba ha ka jingkhynra, ka kynhun ka la lap ïa kitei ki khynnah kynthei na kawei ka kamra ha kawei ka jaka bam bad ka jaka sah ki briew ba wan nabar kaba don hajan ka thaiñ Bora Service.
Ki suba donkti, ryngkat bad u nongpynïaid jong ka hotel, la ïathuh ba ki la phet krad noh tang shwa ba ki pulit kin poi, la ong ki pulit. Ki bor pynïaid ki la sdang ïa ka jingtohkit kaba bniah ban kem ïa ki suba donkti kiba phet krad bad ban tip haduh katno ngut ki nongtrei ha kane ka Hotel ki don kiba la donkti ha kum kine ki kam sniew, la bynrap shuh shuh ki pulit.
