Bangkok, Iaiong:
Ki bor pyniaid ka Thailand ki la ioh kem noh ia uwei u nong China uba dei u nongpyn-iaid jong kawei ka kompeni kaba peit ia ka jingtei ia ka iing heh jong ka Bangkok kaba la twa ha ka jingkhynñiuh jumai mynshem bnai ha kaba phew ngut ki briew ki la iap. Kawei ka kompeni shna ïing kaba la kyrshan da ka China, ka dang shah tohkit halor ka jingkhyllem jong katei ka ïingmala kaba heh haduh 30 mala kaba dang shna ha ka por ba don ka jingkhynñiuh jumai kaba 7.7 Magnitude kaba la jia ha pdeng jong ka Myanmar ha ka 28 tarik u Lber.
Ka jingtei kaba khlem pat dep ka la twa noh tang ha ki sekhon, kaba la pynmih ia ka pum-pum jong ka dewbilat bad ka tdem kaba rben kaba kiew shalor sahit bneng bad kaba la setkut ia ki phew ngut kiba don ha katei ka jaka ba la tap da katei ka tdem pum-pum kaba jur. Ha kane ka jingjia, la pyntikna ba ki don haduh 47 ngut kiba la ngat bad khlad noh syndon hashen bad sa 47 ngut pat ki dei kiba sahkut hapoh.
U Myntri ka tnat aiñ jong ka Thailand, Tawee Sodsong, u la ong ha ka Sngi Saitjaiñ ba ka ïingbishar jong ka Thailand ka la pynmih ïa ki hukum ban kem ïa kitei saw ngut ki riew shimet, ba kynthup ïa ki lai ngut na Thailand ha China Railway No.10 halor ka jingpynkheiñ ïa ka Foreign Business Act– kaba ong ba ki bar jylla ki lah ban bat ym palat ïa ka 49% ki bhah ha kawei ka kompeni.
Ka tnat tohkit ba kyrpang, kaba don hapoh ka tnat bishar, ka la ong ha ka jingpynbna ha ka Sngi Saitjaiñ, ba uwei na kitei ki saw ngut, u la shah kem – u nongmihkhmat jong ka kompeni jong ka China, uba ju ithuh kyrteng kum u Zhang.
Ka China Railway No.10 ka dei shi bynta jong ka jingiatreilang bad kawei ka kompeni na Italy bad Thailand ban tei ia ka tower jong ka State Audit Office ha shwa ba kan khyllem.
U Zhang, u don ha ka kyrteng jong u, kum u nongshim bynta, uba 49% ha katei ka kompeni, katba kitei ki lai ngut ki nongshong shnong jong ka ri Thailand, ki don bynta 51% ha katei ka kompeni.
Hynrei u Tawee u la ong ha ki nongthoh khubor ba “ngi don ki sakhi… ba ki lai ngut ki nong Thailand ki bat ïa ki bynta na ka bynta kiwei riew laitluid nabar ri”.
Ha kaba kyrpang, u Tawee u la ong ba katto katne ki jingtohkit kiba ïadei bad ka jingtwa ki dang ïaid shakhmat, kynthup halor ka jinglah ban don ka jingleh thok ïa ki bid bad ka jingpyndonkam ïa ki jingsoi thok jong ki enjiniar ha ki jingïateh kular jong ki nongpeit ïa ka jingtei.
Ha ka 31 tarik u Lber, ki pulit ki la kem ia 4 ngut ki nong China haba iadei bad ka jingleit rung beaiñ ha ka jaka jong kawei ka ïing kaba dang shna kaba la twa. Ki pulit ki la iathuh ba kine ki briew ki dang pyrshang ban shim ia ki kot ki sla na katei ka jaka shna ïing.
