Washington, Jymmang:
Katkum ki khubor la ong ba ki shipai US ha ka Sngi Nyngkong, ki la siat pynjulor ïa 6 tylli ki lieng rit jong ka Iran bad ka la ioh ruh ban tehlakam ïa ki ‘namding bad ki drone jong ka Iran hadien ba ka Iran ka la pyni da ka bor ïa ka jhad jong ka US kaba thmu ban ïaid jubor na ka duriaw ‘Strait of Hormuz’.
U president jong ka America, U Donald Trump, ula sdang ïa kane ka kam, kaba la khot ka Project Freedom, ha ka sngi Nyngkong, ha ka por ba u thmu ban knieh noh ïa ka jingsynshar halor ka lynti um kaba kongsan na ka Iran, kaba la khang da kaba thikna ïa ka Strait of Hormuz, hadien ba ka US bad ka Israel, ki la sdang ïa ka jingïakynad, ha ka 28 tarik u Rymphang.
U Admiral Brad Cooper jong ka US, uba dei u khliehduh jong ka Central Command, ula kyntait ban kren eiei, la u pyrkhat ba ka jingsangeh thma, kaba la sdang naduh ka 8tarik U Iaiong, ka dang sah ha ka por ba ka Iran, ka dang hiar thma ha katei ka thain, kynthup da kaba thombor da ki drone bad ki namding, ïa ka UAE, ha ka sngi Nyngkong.
Hynrei u Cooper u la kubur ïa ka jingpyrshang jong ki kynhun shipai Islamic Revolutionary Guard Corps ban “tuklar” ïa ka jingtreikam jong u Trump.
“Ka IRGC ka la pynher bun tylli ki missile, ki drone bad ki lieng rit ha ki lieng kiba ngi ïada. Ngi la jop ïa kawei pa kawei na kita ki jingma lyngba ka jingpyndonkam klinik ïa ki tiar ïada,” u la ong.
U Cooper u la ong ba u “ai jingmut tyngeh” ïa ki shipai Iran ban jngai bha na ki marpoh khyndew jong ka US katba ka Washington ka dang sdang ïa kane ka kam, kaba u la ong ba ka kynthup ïa ki 15 hajar ngut ki shipai US, ki liengsuiñ pynjot jong ki shipai duriaw jong ka US, palat 100 tylli ki liengsuiñ kiba don ha khyndew bad duriaw bad ki mar poh duriaw.
