Washington, Jymmang:
Katkum ki khubor, la ong ba ki don ki jingmaham na ki riewshemphang bad ki tnat ïada jong ka US ba u president jong ka US, u Donald Trump, u dei ban pyrkhat bha shwa ban pyndonkam ïa ki namding ‘Dark Eagle’ ba shyrkhei hapoh Middle East.
Ka US Central Command ka dang wad lad ban buh ïa u ‘namding ba la buh kyrpang bha jong ki shipai ha ka thaiñ Middle East, da kaba kyrmen ba ïa une u namding ba lah ban pynjlan ban pyndonkam ban siat ïa ki jaka shna namding Ballistic missile kiba don ha Iran.
Lada ai jingbit, kan dei ka jingpyndonkam ba nyngkong eh ïa utei u namding ba khlaiñ bor jong ka US, uba dang sahdien bad um pat lah ban treikam pura, haba ïa nujor bad ki rukom ïakhun pyrshah kiba la don lypa ha ka jingtreikam ha Russia bad China.
Ka tyllong khubor kaba la ai jingtip halor kane ka kam, ka ong ba ka ‘Request for Forces’, ka batai bniah ba ïa ki ‘namding jong ka Iran, la pynkynriah shabar jong ka ‘strike range’ jong u ‘Precision Strike Missile’, uba lah ban siat palat ïa ka 300 mile.
Katkum ka jingiathuh jong ki ‘riew shemphang, ki don lai tylli ki daw balei ba u Trump u dei ban sangeh noh na kaba pyndonkam ia kine ki namding.
Kawei na ki daw ba kongsan ba la kdew ba ym shym la pyndonkam ïa kine ki namding ka long ka jingma ban pynjur ïa ka jingïakynad da kaba pynkhihwin ïa ki nong Iran. Kaba ar pat ka long ba ki don ki jingkylli kiba mih halor ka jingdonkam jong utei u ‘namding ‘Dark Eagle’, namar ba ym pat lah ban tip kiei ki jingthmu kiba kham bniah ba ka US ka kyrmen ban pyn-urlong ha Iran nalor ka jingpyni bor jongka da ki kam hiar thma nalor suiñ.
Ka jingpynlut kaba jur kaba lah ban wanrah ia ka jinghiar ha ka ioh- ka kot.
Ki ‘namding ki long ruh ka jingkit kaba khia ha ka liang ka pisa tyngka bad ka jingpynlut jong ka sorkar, ha kaba uwei pa uwei u namding u shong dor kumba $15 million: ka jingkheiñ kaba lah ban pynshisha ïa ka jingïakren haba kheiñ ïa ki klur tyngka ba ka Washington ka la dep ban pynlut ha ka jingïakynad ha Iran.
