Arkansas, Jymmang:
Kawei ka nongpynïaid skul jong ka US ha Arkansas ka la shah rai pynrem da kaba set phatok 30 sngi bad 120 sngi ryngkat bad ka jingpeit bniah ia ki jingleh jongka bad ka lah ruh ban hap shong patok kumba 9 snem lada dei shisha katkum ki jingkynnoh ba ka dei ka nongpyniaid jong kawei ka jaka iashoh ‘Fight Club’ jong ki khynnah skul. Ka Dr Mary Tracy Morrison, 50 snem ka rta, ka trai bad ka director jong ka The Delta Institute for the Developing Brain bad ka Engage programme jongka, ka la shah rai pynshitom hadien ba ka la phla ïa ka jingkynnoh ba ka la ailad ia ki khynnah skul jongka ba kin iashoh bad pyni bor haba don kino- kino ki jingiathud hapdeng jongki.
La kem ia ka ha u Iaiong jong u snem ba la dep, kane ka briew kaba la ithuh kyrteng kum ka Morrison, 50 snem ka rta, ha kaba nyngkong la pynngat ia ka ha ki 11 tylli ki kam runar bad 19 tylli ki kam runar. La ioh kem ia ka ha ka camera ba ka dang hikai ia ki 18 ngut ki samla pule ban thombor ia u khynnah shynrang uba dang 13 snem ka rta.
Hadien katei ka jingjia, la iohi ia ka Morrison ba ka la sngew kmen halor ka jinglah jongki ban bud ia ki jingbthah jongka bad ka da pynpaw ia ka jingkmen jongka da kaba ai kti ‘high five’ ia kitei ki khynnah skul.
La iohi ruh ba uwei u khynnah u la shoh bad leh da ka bor ia uwei pat u khynnah, ha kaba la iohi ruh ia katei ka nonghikai ba ka kylli ia utei u khynnah ‘hato utei u khynnah uba shah shoh, u la ju pynthud ne em ia u?’ bad mar kumta hi, la iohi ba utei u khynnah u la ksih ia utei uwei uba la dep shah shoh jem.
La kem ia ka, hadien ba kawei ka longkmie, ka la leit ujor sha ka ophis jong ka Craighead County Sheriff, ba u khun jongka, uba dang khynnah, u la iathuh, ba u la shah pynshitom beiñ ha ka por ba u dang don ha katei ka skul.
La kem ruh sa ia 3 ngut kiwei pat ki nongtrei skul, kiba la tip kyrteng kum u Michael Bean, 38 snem ka rta, ka Kristin Bell, 36 snem ka rta bad ka Kathrine Lipscomb, 45 snem ka rta, ha kaba iadei bad katei ka jingai mynsiem ia ki khynnah skul ba kin thombor bad pyni bor para khynnah pule haba don ka jingiathud.
Nalor ka jingshah set phatok, u nongbishar u la khang ruh ia ka Morrison ban trei ia kino- kino ki kam ban don jingiadei bad ki khynnah, u la hukum ruh ia ka ban aiti noh ia ka jingpyniaid kam jong ka bad ki laisen kiba iadei bad katei ka jaka pule baroh bad u la hukum ia ka ban pyndep ia ka jingpeit bniah ia ka jingkoit jingkhiah ha ka bor pyrkhat bad ban bud ia baroh ki rukom sumar ba la ai jingmut.
