Shillong, Jymmang 07
Ka Executive Committee (EC) jong ka Khasi Hills Autonomous District Council (KHADC) haba pynshai ïa ka jingdawa jong ki khun ki hajar ka Hima Sohra, ka la ong ba ka jingbym ai Sanad ïa u Marremdor Syiem ym dei na kano-kano ka daw, hynrei ba don sa uwei pat uba kwah bad uba don hok ruh ban ïakhun ha ka ilekshon Syiem.
Haba kren sha ki nongthoh khubor u Bah Denzil R Chen EM ba peit ïa ka tnad Elaka u la ong ba la don sa uwei pat u briew u ba mih na ka kur Syiem, u ba pynpaw ba u kwah ban ïaleh ha ka ilekshon Syiem bad katkum ki jinghiar pateng u don ruh ka hok ban ïaleh ha ka jingjied Syiem.
U la ong ba ka daw ka jingslem bad ka jingbym lah ka Council ban ai Sanad ïa u Marremdor Syiem ka long ba, haba don arngut kiba kwah long Syiem, ka Hima ka hap ban pynkhreh ban pynlong ïa ka ilekshon.
U Bah Denzil u la kdew ba ka kyndon jong ka 1959 ka kren shai ba hap ban pynlong ilekshon ban jied ïa u Syiem haba la don bun kiba kwah ban ïoh long Syiem.
U la ïathuh ba ka Council haduh mynta ka dang ap ïa ka jingpynbit pynbiang ka Hima ha ka jingpynïaid u Acting Syiem ban don da ka ilekshon ban jied ïa u Syiem ba pura.
U Chief Executive Member (CEM) u Bah Winston Tony Lyngdoh haba bynrap ïa kane u la ong ba ka jingkwah ki khlieh nongsynshar Shnong ka Hima Sohra kiba wan ban pynlong ka jingïakhih ha phyllaw ka shlem treikam ka KHADC ka long ba ki pynbor ïa ka Council ban ai Sanad noh ïa u Marremdor Syiem ïa u ba ka Dorbar Hima ka la dep ban ai jingmynjur ba un long u Syiem jong ka Hima Sohra.
