Shillong, Jymmang 07
U Myntri Rangbah ka Jylla Conrad K Sangma u la kynthoh tyngeh ïa ka Voice of the People Party (VPP) namar ka dei ka seng kaba dawa nyngkong hynrei ka khlem wan ban ïashimbynta ha ka jingïalang ki seng saiñpyrthei (All Party Meeting) ban ïakren ïa ka kaiphod ka “Expert Committee” halor ka “State Reservation Policy”.
Haba ïakren bad ki nongthoh khubor hadien ba la wai ka jingïalang ban pynbna ïa u Dr. DRL Nonglait kum u kyrtong na ka bynta ka ilekshon Shillong Lok Sabha, u Conrad K Sangma u la ong ba ka Expert Committee kaba la aiti ïa ka kaiphod halor ka bhah thungkam thungjam hynrei haba la sngap ïa ki jingdawa jong ki dkhot ka liang pyrshah hapoh ka ïingdorbar thawaiñ ba dei ban khot ïa ka jingïalang baroh ki seng saiñpyrthei, u la leh ïa kane da kaba khot jingïalang mynhynnin ka sngi ka 6 tarik Jymmang.
U la pynpaw ka jingsngewsih katba kiwei ki seng saiñpyrthei kila wan ïashimbynta, kawei ka seng saiñpyrthei kaba kala wanrah ïa kane ka mat kaba nyngkong hynrei u la ïoh pdiang ïa ka shithi na ki ba ong ba ki don ïa kiwei pat ki kam ba kham kongsan namar kata kim lah ban wan na ka bynta ka “Reservation Policy”.
U Conrad u la ai nuksa ïa bun ki kam kiba la leh da ka Sorkar jong u. “Ha kine ki phra snem bala leit la ka dei ka kam ïakajia khappud, lane la ka dei ka jingdon ST Certificate ha GHADC, la ka dei ka jingdonkam ban don ïa la ka jong ka jingrwai Anthem ka Jylla, ban don la ka jong ka State Emblem, la ka dei ka kam ban ithuh ïa ka Ktien Khasi bad Garo kum ka Official Language-bun ki kam ba kum kine la shimkam da ka Sorkar ba ïalam da ka NPP, kaba ki Sorkar barim kim nud satia ban leh,” u la ong.
U la pynkynmaw haba u la wanrah ïa ka kaiphod jong ka Expert Committee ha ïingdorbar thawaiñ, ka VPP kala dawa ba dei ban khot ïa ka “All Party Meeting” ban ïakren ïa kane ka kam kham bniah hynrei haba u la kular hapoh ka ïingdorbar bad mynhynnin ka sngi u la khot ïa baroh ki seng saiñpyrthei.
“Nga pynpaw ka jingsngewsih haba ka VPP kaba la buh ïa kane ka jingdawa ka khlem wan mih sha kane ka jingïalang,” u la ong.
