Shillong, Jymmang 07
Ki khun ki hajar jong ka Hima Sohra ha ka sngi Palei ki la wan ban tur da ki spah ngut ha ka shlem treikam jong ka Khasi Hills Autonomous District Council (KHADC) ban dawa ba ka dei ban ithuh lane ban ai Sanad noh ïa u Marremdor Syiem ba un long noh u Syiem ba pura jong ka Hima.
Ki paidbah ba kynthup ïa ki rangbah, ki longkmie ki la sdang ïa ka jingïaid kjat naduh na jingkieng Umshyrpi ter-ter haduh ban da poi ha ka phyllaw ka shlem treikam jong ka KHADC. Ki paidbah ki la pyrta ban pynrem jur ïa ka jingpynslem jong ka EC ban ai jingithuh ïa u Marremdor kum u Syiem bad ki la dawa ba ka dei ban ai jingithuh noh ïa u mardor.
Ki paidbah ki la pyrta, “Lada phim tip ïa ki riti ki dustur, phim don hok ban ïai bteng ban don ha ka bor synshar.” Kumjuh ruh ki la dawa ba u CEM ka KHADC u dei ban hiar shuki noh bad pynrem jur ruh ïa ka EC ba la lamkhmat da ka Voice of the People Party (VPP).
Kane ka jingïakhih ki paidbah ka long namar ka jingkuman ka Council halor ka jingpynskhem Syiem hadien ka jingkhlad noh jong u Pa’iem Freeman Sing Syiem (bam kwai ha dwar u Blei) ha ka 31 tarik Risaw 2025.
Haba ïadei bad kane ki la aiti da ka jingthoh sha u CEM ka KHADC, ba ka Executive Dorbar bad ki khlieh nongsynshar shnong jong ka Hima Sohra ki la kyntu ïa ka Council ba ka dei ban ai mardor ïa ka Sanad sha u Pa’iem Marremdor, u ba ki la pynpaw ba la jied da kawei ka sur ba un long kum u Syiem Rangbah. Ki bor synshar Hima ki la kynnoh ba ki la dep ban kyrpad ïa kane ka kam ha u bnai Naiwieng 2025, hynrei ka EC ka khlem ai jubab eiei.
Ha ka jingthoh la kdew ba “Ka Ophis jong u Syiem ka Hima Sohra ka dei ka hok hiar pateng jong ki jait Syiem jong ka Hima Sohra, katkum ka jaitbynriew kyntang. Ïa ki jinglehniam bad jingthang ba khatduh ïa u Syiem ba la khlad noh, lah ban pyndep tang da u Syiem u ba dei hok ban mih bujli ïa u, u ba la jied katkum ka riti dustur bad ka rukom pyntreikam.”
