Shillong, Jymmang 07
Ki nongïalam jong ka kynhun ki khlieh nongsynshar shnong Hima Sohra ki la pynpaw ïa ka jingsngew lyngngoh ba ka Khasi Hills Autonomous District Council (KHADC) ka kyntait ai Sanad ïa u Marremdor Syiem, da kaba ka kam ba u don sa u Bah P Syiem u ba kwah ban long Syiem.
Ïa kane ki la pynpaw hadien ba ki la ïoh ban shong jingïalang bad ka EC jong ka KHADC kaba la kyntait ban ai Sanad ïa u Syiem ba ka Dorbar Hima ka la dep ban mynjur.
U Bah Welborn Bynnud u la pynpaw ïa ka jingsngew lyngngoh ba ka EC ka sngewkhia ïa ka jingkwah long Syiem u Bah P Syiem, da kaba u la ong ba u Bah P Syiem um dei na ka Hima Sohra, hynrei u la shong la sah ha Mairang da ki spah snem bad um don wat tang ka ïingsad ïingsunon hapoh ka Hima Sohra.
U la pynpaw ba ka Hima Sohra kam tip mano ba sei Syiem ïa u Bah P Syiem, namar ba ka Syiem Sad Sohra ka la sei ïa u Pa’iem Marremdor bad ba ka Dorbar Hima ruh ka la mynjur ïa u ba un long u Syiem ba pura ka Hima, katba ka Council pat la palat hynriew bnai ruh kam pat ai Sanad satia ïa u.
U la ong ba ha ka Dorbar Bah ba la long ha ka 3 tarik u Ñaiwieng 2025, kam shem ba don mano-mano ba kwah ban long Syiem bad dei tang u Pa’iem Marremdor u ba bit ban long u Syiem ka Hima Sohra katba ka EC ka KHADC ka ïai ban, ban ai ka jingbishar kaba hok ïa u Bah P Syiem.
U Bah Labirios Syiem Adviser Federation of Khasi State u la ong ba la dep jied ïa u Syiem katkum ka hok ka riti ka Dustur ka Hima ban jied Syiem ïa u Pa’iem Marremdor bad la pyndep ruh ïa ka niam ka rukom. “Ban jied ïa u kñi jong ka kur, ka dei ka kam jong ka kur, ban jied ïa u Rangbah Shnong ne tymmen shong ka dei ka hok ki nongshong shnong, ban jied ïa u Syiem Raid ka dei ka hok kiba don ha kata ka Raid ban jied ïa u Syiem Raid bad ïa u Syiem jong ka Hima Sohra la jied bad ka Dorbar Hima ka la pdiang bad la pyndep ruh ïa ka niam ka rukom,” u la ong.
U la ong ba ka bynta kaba sah mynta ka long sa tang ka kamram jong ka Council ba kan ai noh ïa ka jingithuh ïa u Pa’iem Marremdor namar ba la pyndep lut ïa ki jingdonkam baroh.
