Jowai, Jymmang 07
Ka National People Youth Front (NPYF) 1-Nartiang Constituency ka pynpaw ka jingbym mynjur halor ka jingkren jong u President ka VPP ha ka 5 tarik u Jymmang ha Jowai, halor ka jingkynnoh jong u, ba ym don satia ka jingroi ha ka thaiñ Jaiñtia Hills.
Ka NPYF ka pynshai ba kane ka jingkren jong u Bah Ardent M Basaiawmoit kam ïahap bad ka jingshisha kaba paw ha madan, khamtam eh ha ka 1-Nartiang Constituency.
Ha ki snem ba la leit, la sakhi shai ïa kiba bun ki kam pynroi kiba la urlong, naduh ki surok bad ki jingtei bapher bapher, ka pule puthi, haduh ki lad jingïasoh kiba la pynsuk ïa ka jingïaid lynti bad ka jingïadei hapdeng ki shnong. Kine ki sienjam ki la wanrah ïa ka jingkylla kaba bha ha ka imlang sahlang bad ka jingim jong ki paidbah, la ong ka NPYF ha ka kyrwoh.
Kaba kham kongsan, ka long ban ïohi ïa ka jingpynleit jingmut kaba jur sha ki samla, ki skhim, ki lad jingïoh kam, bad ka jingkyrshan ïa ki nongseng kam, ka jingplie lad ïa ki samla ban kyntiew ïalade bad ban long bynta ba kongsan ha ka jingtei ïa ka lawei jong ka constituency, la ong ka NPYF.
Ha ka jingïaid lynti jong ka jingroi jingpar hapoh ka 1-Nartiang Constituency u Bah Sniawbhalang Dhar MLA ka Nartiang bad Symbud Myntri Rangbah ka Jylla Meghalaya, u don kaba bynta kaba khraw.
Halor kane, ka NPYF ka pynrem jur ïa ki jingkynnoh kiba la mih pyrshah ïa u MLA, bad ka kdew shai ba kitei ki jingkynnoh ki long kiba thok bad kiba khlem nongrim bad ba kine ki jingïakynthoh kim dei tang ban ktah ïa u MLA shimet, hynrei ki long ruh kumba kdew kti pyrshah ïa ki samla bad ki paidbah ka 1-Nartiang Constituency hi baroh kawei.
Ka NPYF 1-Nartiang Constituency, kala ong ba ka ïeng skhem ha ka nongrim ba watla dang donkam ban pynbha shuh shuh ha ki bynta katto katne, hynrei ym dei ban kyntait lane pynjah burom ïa ki jingroi kiba la dep ban urlong bad ba kan ïai bteng ban kyrshan ïa kino kino ki sienjam kiba wanrah ïa ka jingroi, ka jingïatylli bad ka bha ka miat na ka bynta baroh.
Ha kaba kut, haba shimkhia ïa ka jingkren jong u President ka VPP ba u la ong ba u Bah Sniawbhalang Dhar u dei ban leit ‘tuition’ na u ban sngewthuh ïa ka saiñ pyrthei, ka NPYF 1-Nartiang Constituency ka kwah ban pynpaw da kaba shai ba lehse dei ma u (Ardent) hi uba donkam ban leit tuition ha u Bah Sniawbhalang Dhar, khnang ban sngewthuh kumno ban wanrah ïa ka jingroi kaba shisha bad ruh kumno ban jop ha ka jingïakhun ilekshon da ka jingshakri kaba hok ïa ki paidbah.
