New Delhi, ïaïong:
Uwei u nongjngohkai pyrthei u la ïap bad 6 ngut kiwei pat ki briew ki la mynsaw ha ka jingshah thombor ha ki lehnoh ha Pahalgam ha Jammu & Kashmir ha Anantnag distrik ha ka sngi Ba-ar, ong ki heh sorkar.
Ka jingshah thombor ka la jia ha Baisaran, ka jaka rep kaba lah ban poi tang da ka kjat ne da ki kulai, ha kaba ka kynhun ki nongjngohkai pyrthei ki la leit jngoh mynta ka step, la bynrap shuh shuh ki heh sorkar.
Katkam ka khubor khubor ba la ïohlum, u Myntri Rangbahduh, u Narendra Modi u la ïakren lyngba ka Phone bad u Myntri ka tnat ka koit ka khiah jong ka sorkar kmie u Amit Shah bad ong ïa u ba un khmih bniah ïa ki jinglong jingman.
U Modi u la kyrpad ïa u Myntri ka sorkar pdeng ban shim ïa ki “lad ki lynti kiba biang” bad ruh ban leit jngoh ïa katei ka jaka, la ïathuh ki tyllong khubor.
U Myntri Rangbah ka jylla, u Omar Abdullah, u la khot ïa katei ka jingshah thombor, kum ka jingjia ka bym lah ban pdiang.
“Ki nongleh ïa kane ka jingshah thombor ki dei ki mrad, ki bym don jinglong briew & kiba dei hok ban shah ñiewbeiñ. Ym don ki kyntien pynrem kiba biang. Nga phah ïa ka jingsngewlem sha kiba haïing-hasem jong kiba la khlad noh,” u la thoh ha ka rynsan X.
U Myntri Rangbahduh u Narendra Modi u la ong ba ki nongleh kam sniew ha Kashmir kin ym lait na ka jingshah thombor ha Pahalgam, Jammu bad Kashmir. Nga pynrem jur ïa ka jingshah thombor ha Pahalgam, Jammu bad Kashmir. Nga ai jingsngewlem ïa kito kiba la duh noh ïa kiba ïeid ba thoiñ jong ki. Nga duwai ba kiba mynsaw kin koit noh kloi katba lah. la wanrah ha ka ain…kin ym lait im! Ka mat treikam basniew jong ki kan ym jop satia. Ka jingkut jingmut jong ngi ban ïaleh pyrshah ïa ki kam lehnoh ka long kaba ym lah ban pynkhih bad kan nang khlaiñ shuh shuh,” u la ong ha ka rynsan X.
Nga pynrem jur ïa ka jingshah thombor jong ki lehnoh ha Pahalgam, Jammu & Kashmir. Ka jingsngewlem ïa kito kiba la duh noh ïa kiba ïeid ba thoiñ. Nga duwai ba kiba mynsaw kin ïoh noh kloi ïa ka jingkoit. Baroh ki jingïarap kiba lah la ai sha kito kiba shah ktah.
U president ka Congress u Mallikarjun Kharge u la pynrem ïa ka jingthombor jong ki lehnoh ïa ki nongjngohkai pyrthei kiba shida ha Pahalgam, da kaba ong ba ka dei ka jingma ïa ka longbriew-manbriew.
U la ong ruh ba ka jingshngaiñ ka ri ka long kaba kongsan bad kyntu ïa ka sorkar pdeng ban shim ïa ki lad ki lynti ban pynbeit.
“Nga pynrem jur ïa ka jingshah thombor ba shyrkhei jong ki nongjngohkai pyrthei ki bym don pop ha Pahalgam, Jammu & Kashmir. Ka jaitbynriew baroh kawei ka ïatylli ban ïakhun pyrshah ïa ka jingshah thombor jong ki lehnoh lyngba ki bynta khappud. Kine ki jingshah thombor ba shyrkhei ki long ka jingma ïa ka longbriew-manbriew. Kumba la ïathuh ka tyllong khubor la ong ba ki la don bun tylli ki mynsiem bakordor kiba la duh noh. Ha ka kyrteng jong ka seng Congress, ka mynsiem jong nga ka don bad ki longïing jong kine ki lanot. Ki jingmut bad ki jingduwai jong nga ki don bad kine kiba la mynsaw ha ka jingshah thombor,” u la ong ha ka rynsan X.
U Myntri ka tnat ïada ri u Rajnath Singh, u la pynrem ïa katei ka jingshah thombor ha Kashmir, bad ong ba “ka jingshah thombor kaba shyrkhei ïa ki riew paidbah, ki bym don pop, ka dei ka jingleh riewkhlaw bad kaba dei ban kynthoh jur”.
Na ka liang u Lieutenant Governor jong ka Jammu & Kashmir, u Manoj Sinha, u la pynrem ïa ka jingthombor jong ki lehnoh ha ka jaka jngohkai pyrthei jong ka Pahalgam, kaba don ha ka Anantnag distrik jong ka bynta ba shaphang Shathie jong ka Kashmir bad u la byrngem ruh ban pynngat ïa ki nongleh kam sniew ha ki kti jong ka aiñ.
