Shillong, Naitung 13:
U kapten jong ka Argentina, u Lionel Messi, ryngkat ka kynhun jong u, u la thmu ban pynïalehkai ïa kawei ka jingïalehkai ba phylla jong u ha kane ka World Cup, haba un ïakhun pyrshah ïa ka England ha ka sien kaba nyngkong ha ka jingdon bad jingïalam jong u ïa ka kynhun ha ka semi final jong ka FIFA World Cup 2026 ha Atlanta ka ban long ha ka sngi Balang katkum ka IST. Watla u la mihkhmat ïa ka Argentina la palat arphew snem bad ïakynduh ïa kawei pa kawei ka ri kaba jop ïa ka World Cup, u Messi um pat ju ïalehkai pyrshah ïa ka England. Ka jingïalehkai kaba la ap khmih lynti bha kan sa urlong ha ka tei ka jingïakhun semi final jong ka World Cup, kaban thaw sa kawei pat ka lynnong ïa kawei na ki jingïakhun ban sah kynmaw bad ka ban itynnad bha ha ka jingïalehkai phutbol ha ka pyrthei. “Ka dei ka jingïalehkai kaba kyrpang bha namar ba ka dei ka sien kaba nyngkong jong nga. Nga la ïalehkai pyrshah ïa baroh lait noh tang ka England. Bad ka long kaba kyrpang, kumba nga la ong mynshwa, namar ba ka dei ka kynhun kaba heh, kaba donbor. Ka long kaba sngewtynnad ban ïalehkai pyrshah ïa ki kynhun kiba kum kita, ha ki jingïalehkai kum kane, bad khamtam eh ha ki semi-final jong ka World Cup,” la pynpaw u Messi. Une u rangïalehkai ba 39 snem ka rta u la ïakhun mynshwa ïa ka Brazil, Uruguay, Germany, Italy, Spain bad France ha ka por ba u dang ïalehkai bha, hynrei ka England ka dang sah kum ka bor ïalehkai kaba khraw kaba la jah na ka thup jong u ha ka pyrthei. Ka jingïakhun phutbol hapdeng ka England bad ka Argentina ka neh palat hynriew phew snem, kaba la pynmih da ki tynrai histori kiba jylliew, ka jingïakynad ha ka saiñ hima sima, bad katto katne ki por kiba sngewtynnad tam ha ka histori ïalehkai. Hashwa ka jingïalehkai semi final jong ka World Cup kaba don ïa ka jingïalehkai kaba heh bha ka jingïakynduh kaba nyngkong eh jong ki ha ki 21 snem hangne ka don ka jingpynkylla ïa ki saw tylli ki jingïalehkai kiba dang sah bad ba pawnam jong kane ka lympung. Kumban shu pynkynmaw ha u snem 1966 ha ka jingïalehkai Quarter final ka England ka la jop noh da 1- 0 kol ïa ka Argentina. Katba ha u snem 1986 kumjuh da ka jingïalehkai Quarter final ka Argentina ka la jop da 2-1 kol ïa ka England. Ha katei ka jingïalehkai u Diego Maradona u dei u ba la pynsah kynmaw bha da ar tylli ki kol kiba u la ïoh ban thep Kawei na ki kol kaba la paw bha ha ka histori ïalehkai phutbol kaba la tip kum ka The “Hand of God” kaba u Maradona u la lehtuh ban thep ïa ka kol da kaba pyndonkam da ka kti ban pynpoi ïa ka ball bad ïaid lyngba u ‘rangap kol ka England. Wat shibun ki jingïapyrshah lyngba ka kynhun ka England, hynrei la rai ba ka long kaba dei bad kheiñ ïa ka kol. Bad ka kol kaba ar kaba la tip kum ka “Goal of the Century” tang hadien saw minit, u Maradona u la thep ïa ka kol kaba ar bad sdang ïa ka jingïalehkai kaba itynnad bha. Kumjuh ruh ha u snem 1998 kine ki ar tylli ki ri ki la poi ha ka jingïakhun ha ka Round of 16 ha kaba ki la ïakhaid da 2-2 kol bad la jop noh pat da ka Argentina lyngba ki penalty da 4-3 kol. Bad khatduh eh ha u snem 2002 ki la poi ha ka Group Stage ha kaba ka England ka la jop noh da 1-0 ïa ka Argentina. Kane ka long lyngba ka penalty shuwa ka kylla step ha kaba u David Beckham u la thep ïa ka kol bad pynjop ïa ka kynhun ha ka jingïalehkai kaba la long ha Sapporo, Japan.
