Shillong, Naitung 13:
U Jannik Sinner, uba dei uba nyngkong bad ha khlieh eh ha ka kyrdan ka pyrthei ha ka jingïalehkai tennis, u la jop ban ïai bat ïa ka nam lahduh ha ka Wimbledon jong ki shynrang ‘men’s singles’ ha Centre Court, ha kaba u la ïoh rah ïa ka trophi ha ka sien kaba ar lynter ha ka All England Club bad ban khur ïa ka nam lahduh kaba san ha ka Grand Slam baroh kawei. U Sinner u la jop ïa u Alexander Zverev jong ka Germany ha ka jingïakhun kaba tyngeh bha kaba don saw tylli ki set: 6-7, 7-6, 6-3, 6-4. Hadien ba la shah rem ha ka jingïakhun kaba tyngeh ha ka set ba nyngkong, u Sinner u la wan phai biang da ka jingïakhun kaba jur bha ha ka set kaba ar (7-2) bad pynpra ïa ka jingïakhun kaba shyrkhei jong u Zverev ha ki ar tylli ki set ba khatduh. Kane ka jingïakhun phainal ka la long ha ka Sngi U Blei, 12 Naitung 2026. Kane ka jingïakhun kaba jwat ka la kot sha ka por kumba 3 kynta bad 46 minit. Kum ban shu pynkynmaw shuwa ban poi sha ka phainal, u Sinner u la hap ban ïakhun tyngeh ha ka Semi Final, da kaba pynliem noh ïa u Novak Djokovic uba la jop 7 sien ha ka Wimbledon ha ki set – 6-4, 6-4, 6-4. U Sinner u dei u briew ba nyngkong eh jong ka Italy ban jop ïa ki nam lahduh lynter khlem da shah rem ha ka Wimbledon. U kylla long ruh uba saw ha kine ki 25 snem ban iai bat bad neh kum u lahduh, da kaba ïaryngkat kyrdan bad u Roger Federer, Novak Djokovic, bad u Carlos Alcaraz. Ryngkat bad ka trophi ba pawnam, u Sinner u la khur ryngkat bad ka cheque kum u nongjop kaba la kot sha ka £3.6 million ($4.6 million). Da ka jingjop jong u ha u snem 2025 bad 2026, u Sinner u pynskhem ïa ka kyrteng jong u ryngkat bad ka thup ki riew pawkhmat jong ka Open Era kiba la jop ïa ki jingïalehkai ba heh ha London.
