Kolkata, ïaïong:
Ka Myntri Rangbah jong ka West Bengal, ka Mamata Banerjee, ha ka sngi Ba-ar, ka la pynskhem ba “ki briew kiba nabar” ki dei kiba donkti ha ka jingleit rah ïa ka jingïakynad kaba la mih ha ki bynta jong ka Murshidabad halor ka Waqfn Act, bad ka la ong ba kan sa leit jngoh ïa ki jaka ba don ha ka jingïakynduh jingeh ha ka taïew banyngkong jong u bnai Jymmang na ka bynta ban khmih bniah halor ki jinglong jingman.
Ka Banerjee ka la ong ruh ba ka sorkar jong ka kan “pynpaw shen ïa ki nongthaw buit” kiba don ha lyndet jong ki jingkulmar kiba la jia ha ki ar tylli ki Ward jong ka Dhulian ha ka distrik.
“Ka jingshah thombor ka long kaba sngewsih. Ngim kwah ïa ki jingkulmar. Ki don ki briew kiba nabar kiba la pynlong ïa ka, hynrei ngin sa pynpaw pyrthei ïa ki bad ïa ka jingthmu jong ki,” ka la ong ha ka prokram synshar ha Midnapore.
“Nga la kular ïa kiba haïing jong kito kiba la shah pynïap ha katei ka jingshah thombor ban ai bai lutksan kaba T.10 lak uwei uwei. Ngin shna biang ruh ïa ki ïing jong ki hapoh ka skhim ‘Banglar Bari’… Ngan leit shata ha ka taïew banyngkong jong u bnai Jymmang bad ngan bishar bniah ïa ka jinglong-jingman,” la ong ka Banerjee.
U Lat ka Jylla C V Ananda Bose, ha ka 19 tarik, Ïaïong u la ïakynduh ïa ki bahaïing jong uwei u briew bad u khun jong u, kiba la shah pynïap ha ka jingïakynad halor ki jingïakhih pyrshah ïa ka aiñ Waqf (Amendment) Act ha Murshidabad distrik, bad pynthikna ïa ki, ba un ai ïa baroh ki jingkyrshan.
Ki la don kumba lain gut ki briew, kynthup ïa u kpa bad u khun, kiba la ïap bad palat 280 ngut, ki la shah kem, ha kaba ïadei bad ka jingshah thombor, ha kaba sdang jong une u bnai.
