Guwahati, ïaïong:
Ka Gauhati High Court ka la shah pyntreikam da ki kynhun pahara kaba jur bha ha ka step jong ka sngi Ba-ar hadien ka jingbyrngem buh bom kaba la ïoh lyngba ka email.
Ki bor jong ka aiñ ki la pynlong ïa ka jingkhynra hadien ba la pyntip ïa katei ka khubor kaba pyntieng.
Katkum ka jingong jong ki pulit, katei ka email ka la byrngem ban pynbthei hapoh ka jaka jong ka ïingbishar.
“Tang shu ïoh ïa ka khubor byrngem, la phah ïa ka kynhun sha ka High Court. Ki riew shemphang ki dang jurip bniah bha ïa man la ki thliew jong ka jaka. Haduh mynta ym pat lap ïa kaei kaei kaba suba, bad ngi suba jur ba ka dei ka jingthok”, la ong uwei u heh pulit.
Ki jingtip ba kham bniah kin sa mih tang ynda la dep ka jingkhynra, la bynrap shuh shuh u ophisar.
Uwei u heh ka ïingbishar u la pynpaw ba katei ka email ka mih na ka seng bym lah ban tip kaba khot ïalade ka ‘Madras Tigers.’
U nongphah u la byrngem ban pynpra ïa ka ïingbishar baroh kawei, kaba la pynlong ïa ki bor pynïaid ban jubab mardor.
“Ki kynhun pulit ki dang pynlong ïa ka jingkhynra kaba bniah da kaba pyndonkam ïa ki tiar ba kyrpang ban pynthikna ïa ka jingshngaiñ jong ka jaka,” ong u heh sorkar.Watla ka don ka khubor byrngem, ki jingtreikam ba man ka sngi jong ka ïingbishar ki dang sah khlem jingthut.
Ki nongbishar ki la bteng ban bishar ïa ki mukotduma kumba la buh por, bad ka jingtreikam jong ka ïingbishar ka la ïaid khlem jingkhanglad, ong u heh sorkar.
Ki bor synshar ki dang shimkhia bha ïa kane ka kam bad ki dang tohkit ïa ka tynrai jong ka email ban tip ïa ka jinglong ba shisha jong ka jingbyrngem.
