Srinagar, ïaïong:
Ki la don kumba 26 ngut ki briew kiba la shah pynïap ha Pahalgam ha ka sngi Ba-ar na ka jingthombor jong ki lehnoh. Mynta ki shipai Pakistan ki la pynkheiñ ïa ka aiñ sangeh ïasiat ha Poonch.
Ka jingïakynad ha khappud India bad Pakistan ka la nangjur biang hadien ka jingthombor jong ki lehnoh ha Pahalgam kaba don ha ka bynta ba shaphang Shathie jong ka Kashmir ha ka sngi Ba-ar. Naba ki shipai India bad kiwei kiwei ki bor pahara ki la ïoh ïa ka lad ban pynphai ïa ka kput kylliang, ki shipai Pakistan ki la pynkheiñ ïa ka aiñ sangeh ïasiat ha shi lynter u Line of Control ha ka thaiñ Tata Pani jong ka Poonch.
Ki shipai India ki la pynphai kylla da kaba tyngeh ïa ka jingsiat, la ïathuh ki heh sorkar.
Ha kawei pat ka jingjia, ki shipai India ki la ïathuh ba 2 haduh 3 ngut ki lehnoh ki la pyrshang ban rung tuh lyngba ka ki thaiñ ba lait lan jong ka Sarjeevan kaba don ha Uri Nala, Baramulla. Katba ki shipai ki la kerkut ïa ki, ka jingïasiat ka la bteng.
Ki jingïasiat ba markylliang ha Jammu & Kashmir, ki jia hadien shisngi ba ki lehnoh, ki la siat ïa ki nongjngohkai pyrthei ha Pahalgam, ha ka por shiteng sngi jong ka sngi Ba-ar, ha kaba ka la shim ïa ka jingim jong ki 26 ngut na ki, baroh ki dei ki shynrang. Ki nongsakhi ki la ïathuh ba ki lehnoh ki la kylli ïa ka jinglong jong ki bad ki la pynïap ïa kito ki bym dei ki Muslim.
U Narendra Modi, Myntri Rangbahduh, u la pynlyngkot ïa ka jingleit jngoh jong u sha Saudi Arabia bad u la poi hynnin ka step ha New Delhi.
U la pynlong ïa ka jingïalang ba kyrkieh bad u NSA u Ajit Doval bad u Myntri ka tnat korbar ri u Dr S Jaishankar bad u la shim jingkheiñ halor ki jinglong jingman ha Kashmir. U la pynlong ruh ïa ka jingïalang jong ka Cabinet Committee on Security (CCS) ha ka por 11 baje mynstep ha ïingsah jong u hynnin ka sngi.
