New Delhi, ïaïong:
U Myntri Rangbahduh ka ri, Narendra Modi, u la ïakynduh ïa u National Security Adviser, Ajit Doval bad u Myntri ka tnat korbar ri u S Jaishankar, ha ka step jong ka sngi Balang ha kad liengsuiñ, hadien ka jingwan phai na Saudi Arabia ban ïakren halor ka jinglong jingman hadien ka jingthombor jong ki lehnoh ha Pahalgam.
U Foreign Secretary Vikram Misri ruh u la donlang ha katei ka jingïalang, la ïathuh ki heh sorkar. Ki lehnoh ki la hiar thma ïa ka jaka jngohkai pyrthei kaba kongsan jong ka Pahalgam kaba don ha ka bynta Shathie jong ka Kashmir ha ka Sngi Ba-ar bad shim ïa ka jingim jong 26 ngut ki briew kynthup ïa ki bar ri na UAE bad Nepal – bad ar ngut ki trai shnong, la ïathuh shuh shuh ki heh sorkar.
Halor kane ka jingjia na ka liang u Modi u la pynlyngkot ïa ka jingleit sha Saudi Arabia ban wanphai biang, katba u Myntri ka tnat pohïing u Amit Shah, u la leit sha Jammu & Kashmir ban ïalam ïa ki lad jingïada hadien ka jingshah thombor kaba shyrkhei tam kaba la thmu ïa ki nongjngohkai pyrthei ha kane ka them.
