New Delhi, Jymmang:
U President ka All-India Congress Committee (AICC) u Mallikarjun Kharge uba dei ruh u nongïalam ka liang pyrshah ha Rajya Sabbha, u la ong ba ka Congress kan kyrshan ïa ki sienjam ba kan shim da ka sorkar Modi na ka bynta ka jingïatylli jong ka ri.
Ha ka jingkren sha ki lad pathai khubor ha kad liengsuiñ Kalaburagi ha ka sngi Saitjaiñ, u Kharge u la ong ba ka Sorkar Pdeng ka dei ban shimkhia da kaba shim ïa baroh ki seng saiñ pyrthei ha ka jingshaniah.
“Kan ym lah ban shu shong bad ai jingkren. Ngi dei ban ai ka jubab kaba biang ïa kito kiba la kren beiñ ia ngi. Ka sorkar u Modi kam dei ban leh politik halor kane ka kam. Ngim dei ban shu sngap jar lada ka ri jong ngi ka shah kren beiñ. Ngi kyrshan ïa ka jingleh pyrshah ïa ka Pakistan namar ba ka ri jong ngi ka long kaba kongsan ïa ngi”, la ong u Kharge.
Halor ka rai jong ka sorkar pdeng ban pynlong ïa ka jingkheiñ jaitbynriew ryngkat bad ka jingkheiñ briew, u Kharge u la ong ba ka Congress kham mynshwa ka la dawa ïa ka jingkheiñ jaitbynriew, hynrei hadien kata ka BJP ka la rkhie beiñ da kaba ong ba ka Grand Old Party ka “bet ïa u symbai jong ka bih jaitbynriew.”
“Ka jingpynbna ïa ka jingkheiñ jaitbynriew ka lah ban long ka jinglehkai na ka bynta ka ilekshon Bihar kaban sa wan, hynrei ngan ym kren eiei shaphang kane”, la ong u Kharge.
Lada ka sorkar pdeng ka leh da ka jingthmu kaba sniew, ym don mano mano ruh ban shah, u la ong da kaba bynrap ba ki dei ban leh da ka jingthmu kaba bha.
